खागसहित भण्डारी पक्राउ

धनगढी । जिल्ला प्रहरी कार्यालय कैलालीले धनगढीबाट एक जनालाई गैडाको खागसहित पक्राउ गरेको छ ।
प्रहरीले धनगढी–५, जाईका चक्र भण्डारीलाई धनगढी–६, जालीस्थित आफन्तको घरमा लुकेर बसेको बेला खाग सहित पक्राउ गरेको हो । प्रहरीले गैडाको खाग जस्तो वस्तुसहित भण्डारीलाई मंगलबार सा“झ पक्राउ गरेको जनाएको छ ।बाजुराको बुढिगंगा नगरपालिका–३ मा स्थायी घर भएका भण्डारीले भारतबाट सो खाग ल्याएको बयान दिएको प्रहरी नायव उपरीक्षक हरिबहादुर ओलीले बताए । भण्डारीको साथबाट बरामद गरिएको खागको तौल एक किलो दुई सय ९० ग्राम र मोटाई ४२।५ र लम्बाई ३२।४ सेन्टीमिटर छ ।
भण्डारीलाई खाग सहित डिविजन वन कार्यालय कैलालीलाई बुझाउने तयारी गरिएको प्रहरी नायव उपरीक्षक ओलीले बताए । उनले थप अनुसन्धान वनले गर्ने बताए । एक महिनासम्म अनुसन्धान गरी पक्राउ गर्न सफल भएको बताउँदै उनले तस्करीमा संलग्न अन्यलाई पनि पक्राउ गर्ने प्रयास भइरहेको बताए ।वन्यजन्तुको ओखेटोपार तस्करी गर्नेलाई राष्ट्रिय निकुञ्ज तथा वन्यजन्तु संरक्षण ऐन २०२९ अनुसार पाँचदेखि १० लाख जरिवाना र पाँचदेखि १५ वर्ष कैद वा दुबै सजाय हुने व्यवस्था छ ।