अन्तर्राष्ट्रिय भ्रष्टाचार विरुद्धको दिवस मनाइयो

धनगढी । बागेश्वरी असल शासन क्लव, कैलालीको आयोजनामा आइतबार धनगढीमा अन्तर्राष्ट्रिय भ्रष्टाचार विरुद्धको दिवस मनाइएको छ ।
दिवसका अवसरमा धनगढी उपमहानगरपालिकाका धनगढी स्रोत केन्द्रका माध्यामिक विद्यालयहरूको सहभागितामा वक्तृत्व कला प्रतियोगिता आयोजना गरियो ।
कार्यक्रमको धनगढी उपमहानगरपालिका उप्रमुख सुशीला मिश्र भट्टले उद्घाटन गरेकी थिइन् । कार्यक्रम बागेश्वरी असल शासन, कैलालीका अध्यक्ष पाण्डव पुजाराको अध्यक्षतामा भएको थियो ।
सो अवसरमा उपप्रमुख मिश्रले भ्रष्टाचार मुक्त समाज निर्माणमा सबैको भूमिका रहेको चर्चा गरिन् ।
सो अवसरमा आयोजित “भ्रष्टाचार विरुद्ध विद्यार्थीको भूमिका” विषयक वक्तृत्व कला प्रतियोगितामा शारदा माध्यमिक विद्यालयका रचना शाही प्रथम, नवदुर्गा माध्यमिक विद्यालयका जिनत खातुन द्वितीय तथा शारदा माविका सुशील खड्का तृतीय भए भने वासुदेवी माविका यशोदा भट्टले चौथो स्थान प्राप्त गरेका थिए ।
प्रतियोगितामा पत्रकार टेकेन्द्र देउवा र शिक्षक हेमराज जोशी निर्णायक रहेका थिए ।
संस्थाका सदस्य केशव बिष्टले स्वागत गरेको कार्यक्रममा धनगढी स्रोतकेन्द्रका स्रोतव्यक्ति रामबहादुर शाही, धनगढी माध्यामिक विद्यालयका प्राचार्य लक्ष्मणदत्त भट्ट, त्रिनगर माध्यामिक विद्यालयका प्राचार्य भूपालसिंह खड्का लगायतले मन्तव्य व्यक्त गरेका थिए । कार्यक्रमको सञ्चालन संस्थाका मिडिया संयोजक सन्तोष रोकायाले गरेका थिए ।