धनगढी पटेलामा गायत्री महायज्ञ हुँदै : विश्वभरीबाट दुई सय बढी हवनकर्ता र संकल्पकर्ता सहभागी हुने

धनगढी / धनगढीको वेलीपटेलामा आगामी घटस्थापनादेखि गायत्री महायज्ञ आयोजना हुँदैछ । स्वःकल्याण र समाजको कल्याणसहित समुन्नती तथा सुसंगतीको लागि हुने गायत्री महायज्ञको तयारी अन्तिम चरणमा पुगेको छ ।

यो नेपाल वा भारतसहित विश्वमै पहिलो गायत्री महायज्ञ हुने बताइएको छ । ऋषिकृश पीठ धर्म संरक्षण सम्वद्र्धन समितिको आयोजनामा धनगढी उपमहानगरपालिका–७, पटेला धार्मिक बनमा शारदीय नवरात्रिका अवसरमा आगामी १० गतेदेखि महायज्ञ सञ्चालन हुने जनाइएको छ । महायज्ञ ऋषिकेश पीठका श्री श्री १००८ महामण्डलेश्वर स्वामी राहुलेश्वरानन्दगिरीको उपस्थितिमा सम्पन्न हुनेछ ।

महायज्ञबारे जानकारी दिन मंगलबार धनगढीमा आयोजित पत्रकार भेटघाटमा ऋषिकेश पीठका शिष्य कुन्थुश्वरानन्दगिरीले भने– अहिलेसम्म नेपाल र भारतमा समेत यस्तो किसिमको गायत्री महायज्ञ हुनसकेको छैन । वास्तवमा यस्तो किसिमको महायज्ञको आयोजना आफैमा ठूलो सौभाग्य हो ।

पटेलाको धार्मिक बनमा नौ दिनसम्म सञ्चालन हुने महायज्ञमा एक सय आठ हवनकुण्डमा एकसाथ एक सय हवनकर्ताले अटुट यज्ञ गर्नेछन् । शिष्य कुन्थुश्वरानन्दगिरीका अनुसार महायज्ञमा विश्वभरीका हवनकर्ता धर्मावलम्बीहरु सहभागी हुँदैछन् ।

उनले विश्वभरीबाट हवनकर्ता आउने क्रम जारी रहेको बताए । महायज्ञमा एक सय १५ जना वैदिक ब्राह्मणहरुले सघाउनेछन् । वैदिक ब्राह्मणहरु भारतको ऋषिकेश र हरिद्वारबाट आउनेछन् । सङ्कल्पकर्ताहरुको सङख्या पनि करिब एक सय बढी रहने अनुमान गरिएको छ ।

अहिलेसम्म कतै पनि आयोजना हुननसकेको गायत्री महायज्ञ धनगढीमा कसरी सम्भव भयो ? सञ्चारकर्मीहरुको जिज्ञासामा उनले भने– सायद यो भगवती दुर्गाको नै इच्छा होला ।

महायज्ञ आयोजक समितिका अध्यक्ष पुष्करनाथ ओझाले थपे– धनगढीको बेलीपटेला गुरु गोरखनाथको तपस्थल रहेको विश्वास गरिन्छ । यो स्थान चैतन्य मानिन्छ । त्यसैले प्रमुख पक्ष भनेको उत्तम समय र पवित्र स्थानको हो । नवरात्री सबैभन्दा पवित्र समय मानिन्छ ।

घटस्थापनाका दिन कलश यात्राबाट शुरु हुने गायत्री महायज्ञ ११ गतेदेखि महाष्टमीसम्म दैनिक यज्ञवेदी पूजन, उप्रान्त हवन र आरती हुनेछ । त्यस्तै महानवमीका दिन हवन, उत्तराङ्ग हवन, पूर्णाहुती र आरती हुनेछ ।

गायत्री महायज्ञका लागि पटेला धार्मिक बनमा तयारी अन्तिम चरणमा पुगेको छ । महायज्ञ आयोजनामा डेढ करोड रुपैयाँ बढी खर्च हुने अनुमान गरिएको छ । स्वामी कुन्थुश्वरानन्दगिरीका अनुसार महायज्ञमा ६० हजार किलो समिधा, दुई हजार पाँच सय किलो चरु र दुई सय ५० किलो घ्यु प्रयोग हुने छ ।

महायज्ञमा सहभागी हुने हवनकर्ता र सङ्कल्पकर्ता प्रत्येकले ३५ हजार रुपैयाँ स्वयं खर्च गर्ने नियम बनाइएको छ । आयोजक समितिका अध्यक्ष ओझाले भने– यस्तो महायज्ञ निकै कठिन आयोजना मानिन्छ । यो दृढ र पवित्र सङ्कल्पबाट मात्रै सफल हुने आयोजना हो ।