सरकार ढल्दैन, हल्लाका पछि नलागौ परराष्ट्रमन्त्री : देउवा

धनगढी/ नेपाल सरकारका परराष्ट्रमन्त्री डा. आरजु राणा देउवाले सरकार आजै ढल्छ भोली ढल्छ भन्ने हल्लाका पछाडि नलाग्न आग्रह गरेकी छन् ।

नेपाल पत्रकार महासंघ सुदूरपश्चिम प्रदेश समिति र जिल्ला समितिका नवनिर्वाचित पदाधिकारीलाई बधाई ज्ञापन कार्यक्रममा धनगढीमा बोल्दै मन्त्री नेपालका सबै परिवर्तन नेपाली कांग्रेस र नेकपा (एमाले ) मिलेरै डोर्याएको राजनीतिक उपलब्धि मिलेरै गरेकाले स्थायित्वका लागि पनि एक ठाउँमा आउनु परेको दावी पनि गरेकी छन् ।

धेरै पुस्ताको संघर्षपछि प्राप्त संविधानपछि पनि छिटोछिटो सरकार परिवर्तनले नागरिकको इच्छा अनुसारको समृद्धि हासिल गर्न नसक्ने कुरा महसुस भएर कांग्रेसका सभापति शेरबहादर देउवा र एमालेका अध्यक्ष तथा प्रधानमन्त्री केपी शर्मा ओली एक ठाउँमा उभिएको पनि उनले बताइन ।

उनले दुवै दलका पदाधिकारीको कार्य दलका आधारमा मन्त्रीपरिषद्ले काम गरिरहेको बताउदै नेपाल सरकार राजनीति जस्तै आर्थिक, सामाजिक रुपान्तरण र विकास गर्न पुराना कानुनहरु संशोधन गरेर निजी क्षेत्रलाई आकर्षित गर्ने र औद्योगिक वातावरण बनाउन सरकार लागेको बताइन ।

मन्त्री देउवाले सरकार लोकतन्त्रलाई बलियो बनाउन सामाजिक सञ्जाललाई व्यवस्थित गर्न लागेको चर्चा पनि गरिन ।
आन्तरिक मामिला तथा कानुनमन्त्री हिरासिंह सार्कीले सुदूरपश्चिम प्रदेशको सञ्चार नीति तयारी अवस्थामा रहेको र आउँदो अधिवेशनबाट पास भएमा सबै मिडियालाई सम्वोधन गरिने बताए ।

सुदूरपश्चिम प्रदेश सभा सदस्य धर्मराज पाठकले राजनीतिक परिवर्तनका बेला सँगसँगै हिडे पनि पत्रकार महासंघका सदस्यले पेशागत मूल्य मान्यता र मर्यादा जोगाएर महासंघको गरिमा उँचो राख्न आग्रह गरे ।

प्रेस यूनियन र प्रेस चौतारी नेपालले संयुक्त रुपमा कार्यक्रम आयोजना गरेका थिए । यूनियनका सभापति शिव लम्सालले पत्रकारका संस्थाबीचको हार्दिकता तीन वर्षसम्म कायम रहनु बधाईको अर्थ हुने बताए । सभापति लम्सालले सदस्यता शुद्धिकरणको अभियान जारी रहेकोले पेशाकर्म नगर्नेलाई सदस्यता वितरण नगर्ने बताए । चौतारीका अध्यक्ष गणेश बस्नेतले नयाँ नेतृत्वले पत्रकारको साझा लक्ष्य पूरा गर्नुपर्ने बताए । दुबै अध्यक्षले जिल्लामा पत्रकारका संगठनबीच सौहार्द व्यवहार गर्न पनि आग्रह गरे ।

शनिबार नै परराष्ट्रमन्त्री डा. आरजु राणा देउवाको उपस्थितिमा भएको एक कार्यक्रममा नेपाल पत्रकार महासंघ कैलालीको पदस्थापना कार्यक्रम भएको छ । निवर्तमान अध्यक्ष हिमाल जोशीले नवनिर्वाचित अध्यक्ष श्रवण देउवालाई पद हस्तान्तरण गरे ।

सो अवसरमा मुख्यमन्त्री कमलबहादुर शाह, मन्त्रीहरु बहादुरसिंह खड्का, मेघराज खड्का, पूर्वमन्त्री प्रकाशबहादुर देउवा लगायतको उपस्थिति थियो ।