पुस्तकालय हस्तान्तरण

पहलमानपुर । कैलालीको घोडाघोडी नगरपालिका वडा नम्बर १०, पहलमानपुरमा शुक्रबार पुस्तकालय हस्तान्तरण कार्यक्रम भएको छ ।
‘शिक्षित वालवालिकाहरूबाट नै विश्वमा परिवर्तनको थालनी हुन्छ’ भन्ने नाराका साथ सञ्चालित साक्षरता कार्यक्रम अन्तर्गत पुस्तकालय हस्तान्तरण कार्यक्रम भएको जनाइएको छ । सो अवसरमा नगरपालिका प्रमुख ममताप्रसाद चौधरी, बेस कैलालीका क्षेत्रीय अध्यक्ष नाथुराम चौधरी लगायतको उपस्थिति रहेको थियो ।
घोडाघोडी नगरपालिका वडा नम्बर १० लठैयास्थित अमर शहीद आधारभूत विद्यालयलाई रुम टु रिड नामक गैरसरकारी संस्थाले पुस्तकालय हस्तान्तरण गरेको जनाइएको छ । सो संस्थाले अमर शहीद आधारभूत विद्यालयका साथै जनकल्याण आधारभूत विद्यालय र वडा नम्बर ११ मा रहेको पहलमानसिंह मेमोरियल आधारभूत विद्यालयमा भौतिक पूर्वाधार, शैक्षिक सामग्री लगायतका क्षेत्रमा सहयोग गर्दै आइरहेको छ ।
कार्यक्रममा वडा नम्बर १० का अध्यक्ष भीमबहादुर बम, नेकपाका नेता नैनबहादुर चौधरी, रुम टु रिड संस्थाका कार्यक्रम प्रमुख हेम लम्साल, अमर शहीद आधारभूत विद्यालय व्यवस्थापन समिति अध्यक्ष कृष्णकुमार चौधरी लगायतले मन्तव्य व्यक्त गरेका थिए ।
विद्यालयकी शिक्षिका शर्मिला थारूले प्रगति प्रतिवेदन प्रस्तुत गरेको कार्यक्रमको सञ्चालन विद्यालयका प्रधानाध्यापक खुशिराम चौधरीले गरेका थिए ।