पहलमानसिंह मेमोरियलको वार्षिकोत्सव

सुखड । कैलालीको घोडाघोडी नगरपालिका वडा नम्बर ११ आम्वासामा रहेको पहलमानसिंह मेमोरियल माध्यमिक विद्यालयको बिहीबार ३३ औ वार्षिकोत्सव कार्यक्रम भएको छ ।
वार्षिकोत्सव कार्यक्रमको एक समारोहबीच घोडाघोडी नगरपालिका प्रमुख ममताप्रसाद चौधरीले उद्घाटन गरे । कार्यक्रम विद्यालय व्यवस्थापन समिति अध्यक्ष ईश्वरी स्वाँरको अध्यक्षतामा भएको थियो ।
सो अवसरमा नगर प्रमुख चौधरीले घोडाघोडी नगरपालिका शैक्षिक स्तरमा कैलाली जिल्लामा तेस्रो स्थानीय तहको रूपमा रहेको चर्चा गरे । उनले नगरपालिकालाई शैक्षिक केन्द्रका रूपमा विकास गरिने बताए ।
कार्यक्रममा विद्यालय स्थापना तथा विकासमा महत्त्वपूर्ण भूमिका निर्वाह गरेका स्वर्गीय पहलमानसिंह स्वाँर र तारामानसिंह स्वाँरको सालिकमा माल्यार्पण गरिएको थियो । कार्यक्रममा विद्यार्थीहरूले विविध सांस्कृतिक कार्यक्रम प्रस्तुत गरेका थिए ।
कार्यक्रममा घोडाघोडी नगरपालिकाका विद्यालय निरीक्षक उमेशराज रेग्मी, घोडाघोडी नगरपालिकाका स्रोतव्यक्ति राजकिशोर लाल कर्ण र सामुदायिक वन समन्वय समितिका अध्यक्ष पुस्कल बम लगायतले मन्तव्य व्यक्त गरेका थिए ।