जन्ती गएका युवक चार दिनपछि मृत फेला

कञ्चनपुर । कञ्चनपुरको कृष्णपुर नगरपालिका–८ बिचवाका एक युवक वेपत्ता भएको चार दिनपछि मृत फेला परेका छन् । छिमेकी गाउँ कलुवापुरमा विवाहमा गएका १९ वर्षीय सुविल बडायक सोमबार मृत फेला परेका हुन् ।

उनको शव गाउँ नजिकैको उग्रतारा सामुदायिक वनमा पर्ने लम्बा चाँदर भन्ने स्थानको न्युरा खोलामा हत्या गरिएको अवस्थामा फेला परेको हो । इलाका प्रहरी कार्यालय रैकवार बिचवाका प्रहरी नायब निरीक्षक दिलबहादुर कुँवरले बडायकको शव न्युरा खोलामा जमिनमुनी आधा गाडिएको अवस्थामा फेला परेको जानकारी दिएका छन् ।

उनका अनुसार बडायकको घाँटी काटेर हत्या गरिएको छ । यसअघि सोमबार बिहान स्थानीय बासिन्दाले युवकको खोजीका लागि उदासिनता देखाएको भन्दै ईलाका प्रहरी कार्यालय घेराउ गर्नुका साथै सडकमा टायर बालेर विरोध गरेका थिए ।  बडायकको टि–सर्ट रगतले लतपतिएको अवस्थामा भेटिँदा समेत प्रहरीले बेवास्ता गरेको भन्दै प्रर्दशन गरिएको स्थानीयले बताएका छन् ।

गत चैत २८ गते कृष्णपुर नगरपालिका–७ कलुवापुरमा विवाहका लागि गएका १९ वर्षिय बडायकले लगाएको टि–शर्ट रगतले लतपतिको अवस्थामा सोमबार बिहान गाउँ नजिकै फेला परेको थियो ।

प्रहरीले हत्याको आशंकामा कलुवावुरका १८ वर्षिय अयोध्या राना, सोही उमेरका प्रमोद राना र १६ वर्षिया किशोरी शिवानी रानालाई पक्राउ गरेको छ । प्रहरीले घटनाको थप अनुसन्धान भइरहेको जनाएको छ ।