हिलवर्ल्डको वार्षिकोत्सव

धनगढी । धनगढीस्थित हिलवर्ल्ड बोर्डिङ स्कूलको १४ औं वार्षिकोत्सव तथा अभिभावक दिवस सोमबार धनगढीमा भएको छ ।
कार्यक्रमको धनगढी उपमहानगरपालिका प्रमुख नृपबहादुर वडले एक समारोहबीच उद्घाटन गरे ।
सो अवसरमा नगर प्रमुख वडले देश संघीय संरचनामा गइसकेपछि स्थानीय जनप्रतिनिधिको प्राथमिकता शिक्षाको गुणस्तर सुधार नै भएको चर्चा गरे ।
उनले ‘शिक्षालाई व्यवस्थित गरेर गुणस्तरीय शिक्षामा सबैको पहुँच पुर्‍याउने उपमहानगपालिकाको प्राथमिकता रहेको’ बताए । नगर प्रमुख वडले अहिले धनगढी उपमहानगरपालिकाले शिक्षा ऐन निर्माण प्रक्रियालाई अन्तिम चरणमा पुर्‍याएको बताए ।
कार्यक्रम विद्यालय व्यवस्थापन समितिका अध्यक्ष भोजबहादुर बमको अध्यक्षतामा भएको थियो ।
कार्यक्रममा धनगढी उपमहानगरपालिका वडा नम्बर ५ का वडाध्यक्ष हिरासिंह पातली, प्याब्सनका पूर्व अध्यक्ष आरसी यादव, प्याब्सनका अध्यक्ष डिल्लीराज पन्त, विद्यालयका प्रिन्सिपल डिआर शर्मा लगायतले शुभकामना मन्तव्य व्यक्त गरेका थिए ।
विद्यालयका शिक्षक भोवीबहादुर कटुवालले स्वागत गरेको कार्यक्रमको सञ्चालन शिवराज जोशीले गरेका थिए ।
समारोहमा विद्यालयकी शिक्षिका सरस्वती घिमिरे, शिक्षक त्रिवेण कर्ण, विद्यालयकी कार्यालय सहयोगी अनु चौधरी, सवारी चालक सञ्जय चौधरी, सूर्य तामाङ लगायतलाई सम्मान गरियो ।