राष्ट्रिय विद्यार्थी भर्ना अभियान शुरु



धनगढी  । कैलालीसहित देशभरी आइतबारदेखि राष्ट्रिय विद्यार्थी भर्ना अभियान कार्यक्रम शुरु भएको छ । अभियानको प्रदेश नम्बर ७ का मुख्यमन्त्री त्रिलोचन भट्टले धनगढी उपमहानगरपालिका–७, मनिहरास्थित सरस्वती माध्यामिक विद्यालयमा विद्यार्थीलाई भर्ना गरेर शुरु गरेका हुन् ।
मुख्यमन्त्री भट्टले सोही स्थानकी नम्रता रानालाई कक्षा १ मा भर्ना गरेर अभियानको शुभारम्भ भएको जानकारी दिए । उनले विद्यार्थी रानालाई आवश्यक पाठ्यपुस्तक दिएर राम्ररी र मेहनत गरेर पढ्न आर्शिवाद दिए ।
‘जीवनमा सफल व्यक्ति बन्नु छ भने आंशिक ज्ञान लिएर हुँदैन, उच्च शिक्षा हासिल गर्न जरुरी छ’ मुख्यमन्त्री भट्टले भने ‘विद्यालयमा भर्ना मात्र हुनु ठूलो कुरो होइन । नियमित कक्षामा बसेर शिक्षकबाट नयाँ–नयाँ ज्ञान लिन जरुरी छ ।’ मुख्यमन्त्री भट्टले प्रदेश नम्बर ७ मा अधिकाँस व्यक्तिहरू गरिब भएका कारण बिचमै विद्यालय छाड्न बाँध्य भएको स्मरण गर्दै भने ‘म पनि धेरै पढ्न चाहन्थे तर, गरिबीकै कारण बिचमै विद्यालय छोडेर भारतमा रोजगारी गर्न जानु पर्‍यो ।’ उनले प्रदेशमा विचमै विद्यालय छोड्ने प्रवृति रोक्न प्रदेश सरकारले विशेष नीति ल्याउने बताए । उनले आगामी आर्थिक वर्ष २०७५/७६ को प्रदेश बजेटले शिक्षामा बढी जोड दिने आश्वासन दिए ।
उनले शिक्षामा सुधार ल्याउन सरकारले ठूलो लगानी गरेको भएपनि उपलब्धी सोचे जती आउन नसकेको बताए । मुख्यमन्त्री भट्टले अभिभावक, शिक्षक र राज्यको कमजोरीका कारण शिक्षामा लगानी अनुसारको सुधार हुन नसकेको बताउँदै ‘अभिभावकहरू आफ्ना नानीलाई विद्यालय पठाउन्छन्, तर विद्यालयको गतिविधिबारे जानकारी राख्दैनन्, शिक्षकहरू कमीकमजोरीमाथि समीक्षा गर्दैनन् भने राज्यले विद्यालयलाई व्यवस्थित गर्न सकेको छैन ।’ उनले शिक्षक, कर्मचारी, जनप्रतिनिधिहरूले आफना बालबालिकालाई सामुदायिक विद्यालयमा भर्ना गरेर आम नागरिकमा सामुदायिक विद्यालयप्रतिको विश्वास बढाउन आग्रह गरे ।
यस्तै, सामाजिक विकास मन्त्री दीर्घबहादुर सोडारीले कक्षा १ मा देवकी रानालाई टीका लगाएर पाठ्यपुस्तक दिँदै विद्यालयमा भर्ना गराएका थिए । सो अवसरमा बोल्दै मन्त्री सोडारीले अझै पनि सतप्रतिशत विद्यार्थी भर्ना अभियानमा आउन नसकेको बताए । ‘शिक्षा मन्त्रालयको तथ्यांकअनुसार अझै दुई प्रतिशतभन्दा बढी बालबालिका विद्यालय भर्ना अभियानमा समेटिन सकेका छैनन्’ उनले भने ‘प्रदेशमा सतप्रतिशत विद्यार्थीलाई विद्यालयमा ल्याउन पहल गर्ने छु ।’ उनले प्रदेशमा एक व्यक्ति पनि शिक्षाबाट वञ्चित भए शिक्षामा गरेका योग्दानहरू सफल नहुने बताए । उनले विद्यालय र शिक्षाको सुधारमा प्रदेश सरकारले पहल गर्ने बताए ।
यस्तै, मन्त्री सोडारीले धनगढी उपमहानगरपालिका–२ स्थित शारदा माध्यामिक विद्यालयमा पुगेर भारतबाट धनगढी पुगेकी अनिशा विकलाई कक्षा १ मा भर्ना गराए भने सोही विद्यालयका नरेश विकलाई कक्षा ५ मा भर्ना गराएका थिए ।
यस्तै, धनगढी–५, पञ्चोदय उच्च माध्यामिक विद्यालयमा प्रदेश ७ का सभामुख अर्जुनबहादुर थापाले गंगा र जमुना रोकायालाई भर्ना गराए । उनले शिक्षाको सुधारबाट मात्र प्रदेश समृद्धिको कल्पना साकार हुने बताए ।
मुख्यमन्त्री, सभामुख तथा मन्त्रीले भर्ना गराएका अभिभावकहरूले आफना बालबालिकालाई नियमित विद्यालय पठाउने, विद्यालयको क्रियाकलापमा पनि निगरानी राख्ने, कुनै पनि बहानामा बिचमै बालबालिकालाई विद्यालय छोड्न नदिने प्रतिवद्धता गरेका थिए ।
‘हामी सबैको ईच्छा, अनिवार्य नि:शूल्क आधारभुत शिक्षा’ भन्ने मुल नाराका साथ शुरु भएको अभियान १४ गतेसम्म सञ्चालन हुने छ । अभियानअन्र्तगत विद्यालय, स्थानीय तह, जिल्ला शिक्षा कार्यालय, सामाजिक विकास मन्त्रालयले विद्यार्थीलाई विद्यालयमा भर्ना गराउन विभिन्न क्रियाकलाप गर्ने छन् । कैलाली जिल्ला शिक्षा अधिकारी गणेशबहादुर सिंहले विगतका वर्षहरूभन्दा फरक शैलीमा भर्ना अभियानको शुभारम्भ गरिएको बताए । उनले प्रत्येक वडा तथा घरमा रहेका विद्यालय उमेर समूहका बालबालिकालाई विद्यालयसम्म ल्याउन स्थानीय जनप्रतिनिधि, शिक्षाका कर्मचारी, शिक्षकहरूले आ–आफनै किसिमले क्रियाकलाप सञ्चालन गर्ने छन् । उनले विशेषत विद्यालय स्रोत केन्द्रहरूले पर्चा पम्पलेट, घरदैलो, आम सभा, माईकिङ लगायतका क्रियाकलाप १४ गतेसम्म गर्ने र वैशाख भरीनै विद्यालयमा भर्ना अभियान सञ्चालन गर्ने बताए ।

प्रतिक्रिया दिनुहोस्