खेलकुद पत्रकार मञ्चलाई निसर्ग मिडिया कपको उपाधि
धनगढी/ खेलकुद पत्रकार मञ्च, कैलालीले धनगढीमा भएको निसर्ग हस्पिटल मिडिया कप फुटसलको उपाधि जितेको छ ।
आज शुक्रबार भएको फाइनल खेलमा मञ्चले चडेपानी ब्वाइज पत्रकार समूहलाई ३–२ गोलअन्तरले पराजित गर्दै सिल्डसहित २५ हजार रुपैयाँ प्राप्त गर्यो । उपविजेता चडेपानीले १५ हजार रुपैयाँ पायो ।
प्रतिस्पर्धात्मक फाइनल खेलमा खेलकुद पत्रकार मञ्च, कैलालीका प्रदीप पाठकले दुई गोल गरे भने महेन्द्र बमले एक गोल गरे । चडेपानी ब्वाइजका दुईवटै गोल राजेश चौधरीले गरे ।
प्रतियोगिताको सर्वाधिक गोलकर्ता खेलकुद पत्रकार मञ्चका महेन्द्र बम बने । त्यस्तै, मञ्च कै सीताराम ओझा उत्कृष्ट खेलाडी र चडेपानी ब्वाइजका टंक कुँवर उत्कृष्ट गोलकिपर बने ।
यसअघि आजै शुक्रबार भएको सेमिफाइनल खेलमा खेलकुद पत्रकार मञ्च कैलालीले नेपाल पत्रकार महासंघ कैलाली र चडेपानी ब्वाइजले अत्तरिया पत्रकार समूहलाई पराजित गरेको थियो .
प्रतियोगिता समापनका अवसरमा निसर्ग अस्पतालका अध्यक्ष तीर्थ पन्त, गौरिशंकर डेन्टर क्लिनिकका रतन एसके, डल्लुज फुटसलका उमेशबिक्रम शाह, नेपाल पत्रकार महासंघ, कैलालीका अध्यक्ष हिमाल जोशी, प्रतियोगिता संयोजक गगन अयडी, पत्रकार दिलबहादुर छत्याल लगायतले विजेता टिमलाई सिल्ड, पदक र पुरस्कार वितरण गरेका थिए ।
खेलकुद पत्रकार मञ्च, कैलालीको आयोजनामा बिहीबारदेखि शुरु भएको प्रतियोगितामा कैलालीका ६ टिम सहभागी रहेका थिए ।
प्रतियोगिताको मुख्य प्रायोजक धनगढीस्थित निसर्ग अस्पताल रहेको थियो । त्यस्तै, गौरीशंकर डेन्टर क्लिनिक सहप्रायोजक रहेको थियो ।
प्रतियोगिता आयोजनामा एसपीए कलेज, मायामेट्रो अस्पताल, संजिवनी अस्पताल, ज्योती आयल स्टोर, रिया स्पोर्ट्स हाउस, मिश्र जनरल स्टोर, सिंह जनरल स्टोर, नेपाल वेस्टर्न कलेज, रुसलान, डल्लुज फुटसल लगायतले सहयोग गरेका थिए ।
