एमाले उपाध्यक्ष रावल विजयी

अछाम । एमाले उपाध्यक्ष एवं पूर्व उपप्रधान तथा रक्षामन्त्री भीम रावल अछाम १ बाट प्रतिनिधिसभा सदस्यमा निर्वाचित हुनुभएको छ । उहाँ २४ हजार ८८३ मत प्राप्त गरी अछामबाट दोस्रो पटक निर्वाचित हुनुभएको हो । उहाँका प्रतिस्पर्धी नेपाली काँग्रेसका भरत स्वाँरले भने १७ हजार ७१९ मत प्राप्त गर्नुभयो ।
२०७० सालको संविधानसभा चुनावमा उहाँ अछाम क्षेत्र नम्बर १ बाटै झण्डै ५ हजार मतान्तरले विजयी हुनुभएको थियो । यसपटक उहाँ अझै फराकिलो मतान्तरणले विजयी हुनुभएको हो । रावलले उहाँका प्रतिस्पर्धी स्वाँरले भन्दा ७ हजार १ सय ६४ मत बढी ल्याउनु भएको छ ।
भीम रावलको जन्म २०१२ साल मंसिर ३० गते साँफेवगर नगरपालिका ६ अछाममा भएको हो । उहाँ मनमोहन अधिकारी नेतृत्वको पहिलो वामपन्थी सरकारमा संस्कृति तथा पर्यटन मन्त्री हुनुहुन्थ्यो । उहाँ विज्ञान तथा प्रविधि मन्त्री, गृहमन्त्री, रक्षामन्त्री र हुनुभएको थियो । उपप्रधानमन्त्री समेत भैसक्नु भएको छ ।
२०६४ सालको चुनावमा समानुपातिक तर्फबाट सभासद बनेका रावल २०७० सालको चुनावमा अछाम क्षेत्र नम्बर १ बाट विजयी हुनुभएको थियो । त्यसअघि माओवादी सेना समायोजन विशेष समितिको सदस्य समेत रहेका रावलले संयुक्त राष्ट्र संक्रमणकालीन प्राधिकरणमा विशेषज्ञका रुपमा समेत काम गर्नु भएको थियो ।