तेस्रो राष्ट्रिय फ्रिस्टाइल रोल्लर स्केट प्रतियोगिता सम्पन्न (फोटो फिचर सहित)
काठमाडौ/ नेपाल स्केटिङ तथा स्केटबोर्डिङ संघले आयोजना गरेको तेस्रो राष्ट्रिय फ्रिस्टाइल रोल्लर स्केट प्रतियोगिता २०८१ अन्तर्गत विजयी खेलाडीलाई नगद पुरस्कार, ट्रफी, मेडल र प्रमाणपत्र प्रदान गरिएको छ ।
आइतबार सम्पन्न भएको दुई दिने पुरुष र महिलातर्फका खेलाडीलाई राष्ट्रिय खेलकुद परिषद्का सदस्य सचिव टंकलाल घिसिङले नगद पुरस्कार र मेडल प्रदान गरे ।
सो अवसरमा नेपाल क्लाइविङ संघका केन्द्रीय अध्यक्ष रमेश पौडेल लगायतको उपस्थिति रहेको थियो । उनले खेलको माध्यमबाट खेल क्षेत्रको मात्र होइन देशको आर्थिक अवस्था पनि सुधार हुने विश्वास व्यक्त गरे ।
यसअघि सो प्रतियोगिताको उद्घाटन सदस्य सचिव घिसिङले गरेका थिए ।
फ्रि स्टाइल रोल्लर स्केट च्याम्पियनसीप वार्षिक रुपमा आयोजना हुँदै आएको छ । यसपटक महिलातर्फ निर्जला श्रेष्ठ पहिलो र सन्ध्या मगर दोस्रो र निमिशा तामाङ तेस्रो भइन । १५० जना महिलाबाट छनौट भएका १० जनाले तेस्रो राष्ट्रिय फ्रि स्टाइल रोल्लर स्केट च्याम्पियनसीप भाग लिएका थिए ।
पुरुषतर्फको खेलमा राजन मगराती पहिलो, सोहन गुरुङ दोस्रो र रोहन कुँवर तेस्रो भए । सो खेलमा राम्रो प्रदर्शन गरेको भन्दै आरुष अधिकारीलाई सान्तवना पुरस्कार दिइएको थियो ।
यस्तै गरेर पुरुषतर्फबाट तेस्रो राष्ट्रिय फ्रि स्टाइल रोल्लर स्केट च्याम्पियनसीपमा सहभागी हुन २५० जना छनौट चरणमा सामेल भएका थिए ती मध्ये ४० जनाले प्रतिस्पर्धा गर्न पाएको आयोजक संघका केन्द्रीय महासचिव सत्य थापाले जानकारी दिए ।
काठमाण्डौको गल्फुटार भएको प्रतियोगिता अन्तर्गत प्रथम हुनेले १५ हजार द्वितिय हुनेलाई १० हजार र तृतिय हुनेलाई पाँच हजार रुपियाँ नगद सहित ट्रफी, मेडल तथा प्रमाणपत्र प्रदान गरिएको थियो ।
संघका अध्यक्ष अच्युत खनालका अनुसार प्रतियोगिताका विजेतालाई दक्षिण कोरियामा आगामी जुन महिनामा आयोजना हुने एसियन रोल्लर डारबी प्रतियोगितामा सहभागी गराइने छ ।
