आज प्रदेश सभा सदस्यलाई सपथ ग्रहण : ७ नम्बर प्रदेशमा ढिलो गरि सुरु हुने

धनगढी । नेपालमा पहिलो पटक व्यवस्था गरिएको प्रदेश सभाका सदस्यहरूलाई आज पद तथा गोपनियताको सपथ ग्रहण गराइँदैछ । गत मंसिर १० र २१ गते दुई चरणमा गरेर प्रतिनिधि सभा तथा प्रदेश सभा सदस्यको निर्वाचन भएको थियो ।
आज (आइतबार) सबै प्रदेश सभा सदस्यको सपथ ग्रहण गराइन लागेको छ । प्रदेश नम्बर ७ मा प्रदेश सभा सदस्यको सपथ ग्रहणका लागि आवश्यक तयारी भइसकेको क्षेत्रीय प्रशासक लक्ष्मीप्रसाद पौडेलले जानकारी दिए । क्षेत्रीय प्रशासक पौडेलले बिहान ११ बजे सपथ ग्रहण कार्यक्रम तय गरेको भएपनि प्रदेश प्रमुख मोहन मल्ल धनगढी पुग्न सकेका छैनन् ।
खराव मौसमका कारण धनगढी र नेपालगञ्जमा हवाई उडान हुन नसकेपछि प्रदेश प्रमुख सडकमार्ग हुँदै धनगढी आईरहेका छन् । विहान १०:३० मा उनी कैलालीको सिमानामा छोईसकेका छन् । क्षेत्रीय प्रशासक पौडेलले ढेड घण्टा भित्र धनगढी पुगिसक्ने बताए । प्रदेश प्रमुख मल्ल धनगढी पुगेपछि उनले आवास गृहमा भोजन गर्ने कार्यक्रम रहेको छ । प्रदेश प्रमुखले भोजन गरेपश्चात आफनो सचिवालयमा उपस्थित हुने छन् । सचिवालयमा हाजिर गरेपश्चात प्रदेश प्रमुख सपथ गराईने स्थान जिल्ला समन्वय समितिको सभाहलमा पुग्ने छन् ।
क्षेत्रीय प्रशासक पौडेलले ११ बजे तय गरिएको सपथ कार्यक्रम ढिला गरेर दुई बजे सञ्चालन हुने अनुमान व्यक्त गरे । प्रदेश प्रमुख मल्ल शुक्रबार राष्ट्रपतिबाट सपथ ग्रहण गर्न काठमाडौं गएका थिए ।
सपथ ग्रहण कार्यक्रमका लागि जिल्ला समन्वय समिति, कैलालीको सभाकक्षलाई रंगरोगन, सरसफाई तथा सजावट गरिएको छ ।
प्रदेश प्रमुखले ज्येष्ठ प्रदेश सभा सदस्यलाई सपथ ग्रहण गराउने र ज्येष्ठ सदस्यले अरु सदस्यहरूलाई सपथ ग्रहण गराउने कार्यक्रम तय गरिएको छ । यस प्रदेशको ज्येष्ठ सदस्य नेपाली काँग्रेसकी समानुपातिक सदस्य दिव्यश्वरी शाह हुन ।
सपथ ग्रहण अघि राष्ट्रिय गान र शहिदहरुलाई श्रद्धाञ्जली कार्यक्रम तय गरिएको छ । सपथ ग्रहण कार्यक्रममा राजनीतिक दलका नेताहरू, प्रतिनिधि सभा सदस्यहरू, सञ्चारकर्मी लगायतलाई आमन्त्रण गरिएको छ ।
प्रदेश नम्बर ७ मा प्रत्यक्षतर्फ ३२ र समानुपातिक तर्फ २१ जना गरेर कुल ५३ सदस्यीय प्रदेश सभा (संसद) रहेको छ । ७ नम्बर प्रदेश सभामा नेकपा ( एमाले) का २५, नेपाली कांग्रेसका १२, नेकपा माओवादी केन्द्रका १४ र राष्ट्रिय जनता पार्टीका दुई जना सदस्य निर्वाचित भएका छन् ।
सपथ ग्रहण कार्यक्रम हुने र बैठक बस्ने जिल्ला समन्वय समिति कैलालीको सभाकक्ष र वरपर सुरक्षा व्यवस्था कडा बनाइएको छ । कैलालीका प्रमुख जिल्ला अधिकारी गोविन्दप्रसाद रिजालले सुरक्षा व्यवस्था मजबुत बनाइएको बताए ।
सरकारले धनगढीलाई प्रदेश नम्बर ७ को अस्थायी मुकाम तोकेसंगै प्रदेश प्रमुखको कार्यालय तथा आवास र प्रदेश संसद भवनको टुंगो लगाइएको छ ।
प्रदेशको अस्थायी मुकाम र प्रदेश प्रमुख तोकिएपछि क्षेत्रीय प्रशासक लक्ष्मीराज पौडेलको संयोजकत्वमा गठित समितिले आवश्यक भवनहरूको अध्ययन गरी टुंगो लगाएको हो ।
७ नम्बर प्रदेश प्रमुखको कार्यालय उत्तरबेहडीस्थित घरेलु तथा साना उद्योग कार्यालयको नयाँ भवनलाई तोकिएको छ ।
त्यस्तै, प्रदेश प्रमुखको आवास क्षेत्रीय वन निर्देशनालयको भवन तोकिएको छ । क्षेत्रीय बन निर्देशनालय रहेको क्षेत्र सुरक्षाको दृष्टिकोणले उपयुक्त रहेकोले प्रदेश प्रमुखको आवास गृहका रुपमा बनाइएको क्षेत्रीय प्रशासक पौडेलले बताए ।
क्षेत्रीय प्रशासक पौडेलले मुख्यमन्त्रीको आवास गृह र सचिवालयको टुंगो दोस्रो चरणमा लगाइने बताए ।
अहिले तोकिएका संरचनाहरू अस्थायी हुनेछन्’ क्षेत्रीय प्रशासक पौडेलले भने– भोली प्रदेश सरकार गठन भएपछि यी कार्यालयहरू फेरवदल हुनसक्छन् ।
टोलीले मुख्यमन्त्रीको कार्यालय, आवास गृह, संसद सचिवालका लागि पनि भवनहरूको अध्ययन भइसकेको जनाएको छ । मुख्यमन्त्रीको कार्यालय, आवासगृह, संसद सचिवालय तथा अन्य मन्त्रालय र विभागका लागि क्षेत्रीय स्वास्थ्य तालिम केन्द्र, जिल्ला कृषि विकास कार्यालय, जिल्ला सिंचाई कार्यालय लगायतका सरकारी भवनको अध्ययन गरिएको जनाइएको छ । प्रदेश सभाको पहिलो बैठक पनि जिल्ला समन्वय समितिको सभाकक्षमा नै हुने उनले बताए ।
सरकारले गत बुधबार प्रदेश प्रमुख र प्रदेशका अस्थायी मुकाम तोकेपछि प्रदेश सभा गठनको औपचारिक प्रक्रिया अघि बढेको छ । शुक्रबार राष्ट्रपतिले सबै ७ प्रदेशका प्रमुखहरूलाई सपथ ग्रहण गराइसकेका छन् ।