खडगप्रसाद गौचन स्मृति क्रिकेट
डिसिएको लगातार दोस्रो जीत

धनगढी

भैरहवामा जारी खड्गप्रसाद गौचन मेमोरियल अण्डर–१९ क्रिकेट प्रतियोगितामा आइतबारको खेलमा धनगढी क्रिकेट एकेडेमी (डिसिए) ले दोस्रो जीत प्राप्त गरेको छ । डिसिएले काठमाडौंको एक्सिलेन्स क्रिकेट एकेडेमी (सिईसी) लाई ८ रनले पराजित गर्यो । यसअघि, शनिबारको खेलमा डिसिएले बुटवलको न्यू होइजन एकेडेमीलाई पराजित गरेको थियो ।

आइतबारको खेलमा डिसिएले टस जितेर पहिले ब्याटिङ गर्दै निर्धारित २० ओभरमा ८८ रनमा अलआउट भयो । डिसिएका आशिष लुहारले १७ रन तथा निरज ऐरले १४ रन बनाए । बलिङतर्फ सिईसीका किरण घर्तीमगरले चार विकेट लिए । त्यस्तै, ओमकार यादव र शिवाकर श्रेष्ठले दुई÷दुई विकेट लिए ।

डिसिएले दिएको ८९ रनको लक्ष्य पछ्याएको सिईसी ८१ रनमा अलआउट भयो । सिईसीका ओमकर यादवले ३४ रन बनाए । भने सिद्धान्त साउँद र स्मिथ बुढाले १४÷१४ रन जोडे । सिइसीमाथि आठ रनको रोमाञ्चक जीत प्राप्त गर्ने क्रममा डिसिएका निरज ऐर, दिनेशराज जोशी र निशान्त रेग्मीले दुई÷दुई विकेट लिए ।