राजधानी कपको उपाधि लुम्बिनीलाई
![](https://i0.wp.com/anumodankhabar.com/wp-content/uploads/2022/10/rajdhani-cup-768x470.jpg?resize=720%2C441)
धनगढी । लुम्बिनी प्रदेशले कैलालीको धनगढीमा भएको सुदूरपश्चिम राजधानी कप राष्ट्रिय फुटबल प्रतियोगिताको उपाधि जितेको छ । शनिबार धनगढी रंगशालामा भएको फाइनल खेलमा लुम्बिनी प्रदेशले कर्णाली प्रदेशलाई सडनडेथमा हराउँदै उपाधि जितेको हो ।
लुम्बिनीले कर्णालीलाई सडनडेथमा १०–९ ले हराएको हो । यसअघि निर्धारित समय दुबै टोलीले १–१ को बराबरी खेलेका थिए । दुबै टोलीले आत्मघाती गोल गर्दा बराबरी भएको थियो ।
![](https://i0.wp.com/anumodankhabar.com/wp-content/uploads/2022/10/rajdhani-cup-ranur-up-768x512.jpg?resize=720%2C480)
उपाधिसँगै लुम्बिनी प्रदेशले नगद ५ लाखसहित ट्रफी मेडल प्राप्त गरेको छ । उपविजेता कर्णाली प्रदेशले नगद ३ लाखसहित ट्रफी मेडल प्राप्त गरेको छ ।
प्रतियोगिताको उत्कृष्ट खेलाडी लुम्बिनी प्रदेशका फागुराम चौधरी भए । उनले नगद २० हजार पाए । यस्तै, उत्कृष्ट रक्षक लुम्बिनी प्रदेशका चेतन थारू, उत्कृष्ट गोलरक्षक कर्णाली प्रदेशका सुदीप शाही ठकुरी, उत्कृष्ट प्रशिक्षक कर्णाली प्रदेशका चन्द्रप्रकाश शाही, उत्कृष्ट मिडफिल्डर कर्णाली प्रदेशका भुपेन्द्र शाही भए । उनीहरूले जनही दश/दश हजार पाए ।
प्रतियोगिता पिएफए स्पोर्टस् क्लब अत्तरियाको आयोजनामा भएको थियो ।