१५ मंसिर २०७९, बिहीबार

कञ्चनपुरमा ९ करोडको लागतमा खानेपानी आयोजना निर्माण हुँदै



कञ्चनपुर । भीमदत्त नगरपालिकाका दुई वडाका २ हजार ५ सय बासिन्दालाई शुद्ध पेयजल उपलब्ध गराउनका लागि खानेपानी आयोजना निर्माण कार्य सुरु गरिएको छ।
नगरपालिका–२ र ५ का बासिन्दाका लागि उल्टाखामस्थित महोलियामा ९ करोड ४० लाखको लागतमा खानेपानी आयोजना निर्माण कार्य सुरु गरिएको हो।
नेपाल खानेपानी संस्थानले बनाउन लागेको यो आयोजनाबाट नगरपालिका–२ का १ हजार २ सय र ५ का १ हजार हजार ३ सय बासिन्दा खानेपानी सुविधा पाउनेछन्।
खानेपानी संस्थानका कार्यालय प्रमुख हरिकुमार श्रेष्ठले चालू आवभित्र बासिन्दाको घरमा पानी पुर्याउने लक्ष्य राखिएको बताए। ‘उल्टाखाम र वनगाउँका बासिन्दाका लागि खानेपानी आयोजना बन्न लागेको हो,’ संस्थानका कार्यालय प्रमुख श्रेष्ठले भने, ‘यो वर्षभित्र पानी उपलब्ध गराउँछौँ।’
चालू आवमा साढे १५ किलोमिटर पाइप लाइन विस्तार हुने र दुवै स्थानमा ट्युवेल जडान गरिने कार्यालय प्रमुख श्रेष्ठको भनाइ रहेको छ।
आयोजनाअन्तर्गत ४ सय ५० घनमिटरका २ ट्यांकी निर्माण गरिनेछन्। नगरपालिका–२ का अध्यक्ष डम्मर सिंह कार्कीले खानेपानी सञ्चालन भएपछि नल्काको पानी खानुपर्ने बाध्यता हट्ने बताए।
यसैगरी नगरपालिकाको उत्तरी क्षेत्रका बासिन्दाका लागि नगरपालिका–८ तिलौचारमा २८ करोड ५० लाखको लगानीमा अर्को खानेपानी आयोजना निर्माण गर्न लागिएको छ।
चुरे क्षेत्रमा गर्मीका बेला नल्का र कुवाँमा पानी सुक्ने समस्या हुँदा स्थानीय बसिन्दाले निकै सास्ती खेप्दै आएका छन्।
आयोजना निर्माण भएपछि स्थानीय बासिन्दाले सहज रुपमा पानी पिउन पाउने छन्।
नगरबासीलाई शुद्ध पेयजल उपलब्ध गराउनका लागि खानेपानी आयोजना सञ्चालन गरिएको नगर प्रमुख सुरेन्द्र बिष्टले बताए।

प्रतिक्रिया दिनुहोस्