सुप विश्वविद्यालय विकास र विस्तारमा चिन्तित हुन जरुरी: नगर प्रमुख विष्ट

महेन्द्रनगर । भीमदत्त नगरपालिकाका नगर प्रमुख सुरेन्द्र विष्टले सुदूरपश्चिमाञ्चल विश्वविद्यालयको विकास र विस्तारमा सबैले चिन्तत हुनु पर्नेमा जोड दिएका छन् ।
सत्तारुढ नेकपा आवद्ध प्राध्यापकहरुको भेलामा नगर प्रमुख विष्टले विश्वविद्यालयमा देखिएका समस्या समाधानका लागि सबैले गम्भीर हुनु पर्ने जनाए ।
‘विश्वविद्यालयको विकास र विस्तारका लागि सबैले चिन्तित हुन जरुरी छ’ नेकपा पार्टी कार्यालयमा आयोजना गरिएको कार्यक्रममा नगर प्रमुख विष्टले भने,‘के कस्ता सुधार गर्न सकिन्छ, त्यसमा सबै गम्भीर होऔ, सुधार के गर्न सकिन्छ त्यसका लागि एक होऔ, विश्वविद्यालय सुधार आउँछ ।’
सुदूरपश्चिमाञ्चल विश्वविद्यालय स्थापना आन्दोलनका अभियन्ता नगर प्रमुख विष्ट सुप विश्वविद्यालय सिनेट सदस्य छन् । विश्वविद्यालयसित आफ्नो विद्यार्थी जीवनबाट नाता जोडिएको उल्लेख गर्दै उनले विश्वविद्यालय सुधारका लागि सबै प्राध्यापक, कर्मचारी सबैलाई गम्भीर हुन आव्हान समेत गरे ।
नगर प्रमुख विष्टले विश्वविद्यालयका सुधारका लागि प्राध्यापकहरुलाई कार्य योजना सहितको अवधारणा बनाउन आग्रह गरेका छन् ।
भीमदत्त नगरपालिका र विश्वविद्यालयबीच सहयोग र सहकार्यका लागि सम्झौता गरिएको उल्लेख गर्दै आगामी दिनमा नगरपालिकाबाट हुने सबै सहयोग गरिने प्रतिबद्धता जनाए ।
कार्यक्रममा प्राध्यापकहरुले नगर प्रमुख विष्टलाई विश्वविद्यालय स्थापनाका लागि खेलेको भूमिका स्मरण गराउँदै यसलाई शैक्षिक धरोहर बनाउन पहल गर्न आग्रह गरेका छन् ।
‘जसरी तपाईले हिजाको दिनमा विश्वविद्यालय स्थापनाका लागि भूमिका खेल्नु भयो, अहिले सिनेट सदस्य हुनु हुन्छ,’ उप प्राध्यापक उत्तम थापाले, ‘अहिले सुधारका लागि दाईको खाँचो देखियो, यसमा पहलकदमी लिन हुन आग्रह गर्छु ।’
विश्वविद्यालयको केन्द्रीय क्याम्पसमा सञ्चालन हुनु पर्ने एमबीएको पढाई आङ्गिक क्याम्पसबाट गर्न लागिएकोमा चिन्ता जाहेर गर्दै सबैले गम्भीर हुन पर्ने उप प्राध्यापक थापाको भनाई थियो ।
उप प्राध्यापक खगेन्द्र प्रसाद जोशीले सुदूरपश्चिमाञ्चल विश्वविद्यालयमा केही पदाधिकारी र कर्मचारीका कारण गर्नै नहुने कार्य भएकाले त्यसलाई सबैले रोक्नु पर्नेमा जोड दिए ।
उप प्राध्यापक शंकरदत्त भट्टले विश्वविद्यालय सुधारका लागि आन्दोलन गरिएपछि कुलपति र सहकुलपति दुबैले विश्वविद्यालय सुधारका लागि छानबिन समिति गठन गरेकाले सबैले समितिलाई आवश्यक सहयोग गर्नु पर्ने बताए ।
प्राध्यापक राजेन्द्र प्रसाद जोशीले प्राध्यापक संगठन एकता नभएर केही अन्यौलता देखिएको उल्लेख गर्दै एकीकरणपछि सशक्त भएर जाने बताए ।
कार्यक्रममा देब सिह नाथ, अजुर्न सिह नेगी, बीर बहादुर सिह, डम्बर सिह बोहरा, विश्वविद्यालय कर्मचारी संघका दिलिप सिह धामी, विनोद जोशी लगायतले आ–आफ्नो धारणा राखेका थिए ।
कार्यक्रममा पूर्व नेकपा (एमाले) प्रदेश ७ कमिटी सदस्य शंकदत्त बोकटी, भीनपा वडा नं. ६ का वडा अध्यक्ष हरक सिह धामी लगायत सहभागी थिए ।