३ मंसिर २०८३, बुधबार

कार्यकर्ताको उत्साह बढाउला त एमाले भेलाले ?



काठमाडौँ / नेकपा (एमाले) ले पार्टीको आगामी राजनीतिक रणनीति तय गर्न र कार्यकर्तामा उत्साह थप्ने उद्देश्यसहित आज काठमाडौँमा केन्द्रीयस्तरको भेला आयोजना गर्दैछ। बबरमहलस्थित कार्की ब्यांक्वेटमा बिहान ११ बजेदेखि सुरु हुने भेलामा सहभागी हुन अधिकांश नेता तथा कार्यकर्ता काठमाडौँ पुगिसकेका छन्।

पार्टीका उपमहासचिव लेखराज भट्टका अनुसार राष्ट्रिय राजनीतिलाई स्पष्ट दिशा दिने र आगामी स्थानीय तह निर्वाचनको तयारीलाई प्रभावकारी बनाउने विषय भेलाका मुख्य प्राथमिकता हुन्।

हिजो बसेको पार्टी स्थायी कमिटी बैठकले भेलामा प्रस्तुत गरिने एजेण्डा अनुमोदन गरिसकेको छ। भेलामा असोज ५ देखि ८ गतेसम्म सम्पन्न केन्द्रीय कमिटी बैठकका निर्णय कार्यान्वयनमा एकरूपता कायम गर्ने तथा पार्टीले आगामी दिनमा गर्नुपर्ने १५ वटा कामका विषयमा छलफल हुने भट्टले बताए।

भेलामा केन्द्रीय कमिटीका सदस्य, प्रदेश तथा जिल्ला कमिटीका पदाधिकारी, पालिका कमिटीका अध्यक्ष र उपाध्यक्ष, जनसंगठनका प्रतिनिधि, केन्द्रीय निकायका सदस्य, संघीय तथा प्रदेश सांसद र स्थानीय तहका प्रमुख तथा उपप्रमुख सहभागी हुनेछन्।

भेलाको उद्घाटन गर्दै पार्टी अध्यक्ष केपी शर्मा ओलीले सम्बोधन गर्ने कार्यक्रम छ। त्यसैगरी वरिष्ठ नेता विद्यादेवी भण्डारी, उपाध्यक्षद्वय रामबहादुर थापा र विष्णु पौडेल तथा महासचिव शंकर पोखरेलले पनि भेलालाई सम्बोधन गर्ने प्रचार तथा प्रकाशन विभाग प्रमुख निरज आचार्यले जानकारी दिए।

पछिल्लो राजनीतिक परिस्थितिमा पार्टीको भूमिका, संगठनको अवस्था र आगामी निर्वाचनको तयारीबारे नेतृत्वले कस्तो सन्देश दिन्छ भन्ने विषयलाई कार्यकर्ताले चासोका साथ हेरेका छन्। पार्टी नेतृत्वका धारणा र भेलाबाट आउने निर्णयले एमालेको संगठनात्मक गतिविधि र कार्यकर्ताको मनोबलमा कस्तो प्रभाव पार्छ भन्ने चासो पनि उत्तिकै छ।


प्रतिक्रिया दिनुहोस्
ताजा समाचार