राजबहादुर शाह फेरि बने सबैभन्दा बढी व्यक्तिगत आयकर तिर्ने व्यक्ति
काठमाडौ/ राष्ट्रिय कर दिवसको अवसर पारेर सरकारले विभिन्न विधामा सबैभन्दा बढी कर योगदान गर्ने करदातालाई सम्मान गरेको छ। व्यक्तिगत आयकरतर्फ यस वर्ष पनि राजबहादुर शाह सबैभन्दा बढी कर तिर्ने व्यक्तिका रूपमा सम्मानित भएका छन्।
शाह यसअघि २०७७, २०७९, २०८० र २०८२ सालमा पनि सबैभन्दा बढी व्यक्तिगत आयकर तिर्ने करदाताका रूपमा सम्मानित भएका थिए। यससँगै उनले पटक–पटक सर्वाधिक व्यक्तिगत आयकर तिर्ने करदाताको सम्मान पाएका छन्।
त्यसैगरी, संस्थागततर्फ सबैभन्दा बढी आयकर तिर्ने निकायका रूपमा सूर्य नेपाल प्रालि छनोट भएको छ। सरकारले सूर्य नेपालसहित विभिन्न २० वटा संस्थालाई सम्मान गरेको छ।
हरेक वर्ष मंसिर १ गते राष्ट्रिय कर दिवस मनाइन्छ। यस अवसरमा सरकारले कर प्रणालीमा योगदान पुर्याउने व्यक्ति तथा संस्थालाई विभिन्न विधामा सम्मान गर्दै आएको छ।
प्रतिकूल आर्थिक तथा व्यावसायिक परिस्थितिका बाबजुद व्यवसायलाई निरन्तरता दिँदै राजस्वमा उल्लेखनीय योगदान पुर्याएको र रोजगारी सिर्जनामा भूमिका खेलेको भन्दै सरकारले उत्कृष्ट करदातालाई सम्मान गरेको हो।




