दीपेन्द्रको अर्धशतकमा सुदूरपश्चिमले लुम्बिनीलाई दियो १०६ रनको लक्ष्य
काठमाडौ/ कप्तान दीपेन्द्रसिंह ऐरीको अर्धशतकको मद्दतमा सुदूरपश्चिम रोयल्सले नेपाल प्रिमियर लिग (एनपीएल) को पहिलो क्वालिफायरमा लुम्बिनी लायन्ससामु १०६ रनको लक्ष्य प्रस्तुत गरेको छ ।
कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित ओभरमा ८ विकेट गुमाउँदै १०५ रन बनाएको हो ।
सुदूरपश्चिमका लागि कप्तान दीपेन्द्रले सर्वाधिक ५२ रनको योगदान दिए । उनले ५१ बलको सामना गर्दै तीन चौका र एक छक्का प्रहार गरे । अन्तिम ओभरमा आउट हुनुअघि उनले निकै धैर्यपूर्ण ब्याटिङ गर्दै टोलीको स्कोर उकासेका थिए ।
सुरुवातमै दबाबमा परेको सुदूरपश्चिमका लागि दीपेन्द्रले जिम्मेवारी सम्हालेका थिए । टोलीको स्कोर ८ रन हुँदा चौथो ओभरमा क्रिजमा आएका उनले इशान पाण्डेसँग मिलेर महत्त्वपूर्ण अर्धशतकीय साझेदारी गरे । उनीहरूको साझेदारीले धरमराएको सुदूरपश्चिमको इनिङ्सलाई सम्हाल्न मद्दत गरेको थियो ।
डिफेन्डिङ च्याम्पियन लुम्बिनी लायन्सले टस जितेर पहिले बलिङ गर्ने निर्णय गरेको थियो । अब उपाधि यात्राको महत्त्वपूर्ण खेलमा लुम्बिनीले जितका लागि १०६ रन बनाउनुपर्नेछ ।




