सबैले इमान्दारिपूर्वक भूमिका निर्वाह गरेमात्र बलियो शासन– सभामुख थापा
धनगढी। सुदूरपश्चिम प्रदेश सभाका सभामुख अर्जुनबहादुर थापाले सबै पक्षले इमान्दारिपूर्वक आ–आफ्नो भूमिका निर्वाह गरे मात्रै जनताको शासन बलियो हुने बताएका छन् ।
सभामुख थापाले एकले अर्काको एकोहोरो विरोध र आलोचनाले मात्रै परिवर्तित शासन प्रणाली बलियो र संस्थागत हुननसक्ने बताए ।
सञ्चार प्रतिष्ठान नेपालद्वारा शनिबार धनगढीमा आयोजित “परिवर्तित शासकीय संरचनामा मुलभूत सवाल, पत्रकारहरूका लागि क्षमता अभिवृद्धि” कार्यशालामा सभामुख थापाले नेतादेखि पत्रकार सबै पक्षले आफ्नो पेसा र दायित्वप्रति निष्ठावान भएर भूमिका निर्वाह गर्न आग्रह गरे ।
उनले भने– प्रतिपक्षले सधैं सत्तापक्षलाई गलत मात्रै देख्ने र मिडियाले पनि सधैं नकारात्मक समाचार सम्प्रेषण गर्ने प्रवृत्ति गलत हो ।
कार्यक्रममा धनगढी उपमहानगरपालिका उपप्रमुख सुशीला मिश्र भट्टले अझैं पनि स्थानीय तहमा संसदीय अभ्यास कमजोर रहेको चर्चा गरिन् ।
उपप्रमुख भट्टले मुलुकमा लागू भएको संघीय लोकतान्त्रिक गणतन्त्रात्मक संसदीय प्रणाली बलियो बनाउन तीनै तहका सरकारका साथै सबै पक्षबीच बलियो समन्वय र सहकार्य अनिवार्य रहेको बताइन् । उनले भनिन्– बलियो समन्वयको भूमिका सञ्चार क्षेत्रले निर्वाह गर्नु आवश्यक छ ।
उनले अहिले पनि संघीय सरकारले सकेसम्म स्थानीय तह तथा प्रदेश सरकारलाई अधिकार दिन हिच्किचाई रहेको महसुस भइरहेको चर्चा गरिन् ।
कार्यक्रममा नेपाल पत्रकार महासंघका पूर्व केन्द्रीय सचिव जगत नेपालले पत्रकारहरूलाई कुनै पनि स्थितिमा गल्ती गर्ने सुविधा नरहेको बताए ।
उनले भने– राजनीतिक नेतृत्वले गल्ती गर्दा पा“च वर्षपछि जनताले सजाय दिन्छन्, तर पत्रकारले गल्ती गर्दा तत्काल सजाय पाउनुपर्ने स्थिति हुन्छ ।
उद्घाटन कार्यक्रम संस्थाका अध्यक्ष प्रकशबिक्रम शाहको अध्यक्ष्ग्तामा भएको थियो ।
आज –आइबार) सम्म सञ्चालन हुने कार्यशालामा कैलालीका २१ जना सञ्चारकर्मीको सहभागिता रहेको छ ।