सुदूरपश्चिम प्रदेशका सामाजिक विकास मन्त्रीको गाडी दुर्घटना
धनगढी । सुदूरपश्चिम प्रदेश सरकारका सामाजिक विकासमन्त्री दीर्घबहादुर सोडारीले प्रयोग गर्दै आएको बा२झ ३१२५ नं को स्कारपियो जिप शुक्रबार राति कैलालीमा दुर्घटना भएको छ ।
जिपका चालकसहित तीन जना घाइते भएको कैलाली प्रहरीले जानकारी दिएको छ ।
जिपमा मन्त्री सोडारी सवार नरहेको अवस्थामा भएको दुर्घटनामा परी जिपका चालक गोदावरी नगरपालिकाका धोजेन्द्र शाही, निजकै भान्जी नाता पर्ने दश वर्षीया आयुश्मा शाही र से३प २४२० नं को मोटरसाइकलका चालक गौरीगंगा नगरपालिकाका सुरेन्द्र चन्द घाइते भएको जिल्ला प्रहरी कार्यालय कैलालीका प्रहरी नायब उपरीक्षक हरिबहादुर ओलीले बताए ।
दुर्घटनाबाट गम्भीर घाइते मोटरसाइकलका चालक चन्दलाई धनगढीको निर्सग अस्पतालबाट थप उपचारका लागि काठमाडौं सिफारिश गरिएको छ । अन्य दुईको अवस्था सामान्य छ ।
पूर्व–पश्चिम राजमार्गअन्तर्गत पर्ने कैलालीको बडैपुर सडक खण्डमा से३प २४२० नं को मोटरसाइकल र मन्त्री सोडारीको स्कारपियो जिप एकापसमा ठोक्किएर दुर्घटना भएको थियो ।