विदेशमा पहिलो पटक देउडा गीतको छायांकन

धनगढी । देउडा सर्जक लक्ष्मण अधिकारीको दोस्रो गीत ‘कम्मर लड्काई लड्काई…’ नयाँ वर्षमा बजारमा आउने भएको छ । पहिलो गीत ‘दुवईको लाहुर्‍या…’ को सफलतापछि अधिकारीको दोस्रो गीत बजारमा आउन लागेको हो ।
अधिकारीको आफ्नै शब्द र राजेन्द्र शाह बिपीको लय रहेको यस गीतमा चर्चित गायक तथा संगितकार बिनोद बाजुरेली र स्मृति शाहीको स्वर रहेको छ ।
बैशाख १ गते बजारमा आउन लागेको यस गीतको म्युजिक भिडियोको छायांकन दुबईमा गरिएको छ । विदेशमा पहिलो पटक देउडा खेल सहित म्युजिक भिडियो छायांकन गरिएको यो पहिलो देउडा गीत हो ।
सागर परियार तथा लोकराज पाण्डेयको छायांकन अनि सागर बोहराको निर्देशन रहेको म्युजिक भिडियोमा लक्ष्मण अधिकारी र बिमला महरा गुड्डीको मुख्य अभिनय रहेको छ । सुप समाज युएई तथा प्रवासमा रहेका सुदूरपश्चिमेलीहरूको देउडा संस्कृतिप्रतिको लगावको उपज यस गीतको म्युजिक भिडियो विदेशी भूमिमा संभव भएको अधिकारीको भनाई छ ।
बिगत ८ वर्षदेखि दुबईमा कार्यरत सर्जक अधिकारी नेपालका पुर्व अन्तर्राष्ट्रिय कबड्डी खेलाडी पनि हुन ।