बाजुरा/ नेपाली चलचित्र क्षेत्रकी नायिका श्वेता खड्काले बाजुराको प्रसिद्ध धार्मिक तथा पर्यटकीयस्थल बडिमालिकाको प्राकृतिक सुन्दरताले आफूलाई मन्त्रमुग्ध बनाएको बताएकी छन्।

बडिमालिका जाने क्रममा देखिएको मनमोहक प्राकृतिक दृश्यबाट प्रभावित हुँदै उनले भनेकी छन्, ‘स्वर्ग त देखेको छैन, तर बाजुरा बडिमालिका जाने बाटोमा आइपुग्दा लाग्यो, कथामा सुनिएको स्वर्ग सायद यस्तै हुँदो हो।’

उनको यो अभिव्यक्तिले बडिमालिकाको प्राकृतिक सौन्दर्य र पर्यटन सम्भावनालाई फेरि चर्चामा ल्याएको छ। हरियाली पाटन, आँखाले नभ्याउने विशाल घाँसे मैदान, रंगीविरंगी फूल, हिमालका मनोरम दृश्य र शान्त वातावरण बडिमालिकाका प्रमुख आकर्षण हुन्।

सुदूरपश्चिम प्रदेशको बाजुरा जिल्लामा अवस्थित बडिमालिका धार्मिक आस्था र प्राकृतिक सौन्दर्यको अनुपम संगम हो। समुद्री सतहबाट करिब चार हजार दुई सय मिटर उचाइमा रहेको बडिमालिका क्षेत्रबाट अपि र साइपाललगायतका हिमशृङ्खलाको मनोरम दृश्य अवलोकन गर्न सकिन्छ।

यहाँको विशाल त्रिवेणी पाटन, हरिया डाँडाकाँडा र खुला आकाशले पर्यटकलाई लोभ्याउँछन्। वर्षायाममा विभिन्न प्रजातिका फूलले पाटन रंगीन बन्ने भएकाले यो क्षेत्र अझ आकर्षक देखिन्छ।

बडिमालिका धार्मिक दृष्टिले पनि उत्तिकै महत्वपूर्ण मानिन्छ। यहाँस्थित बडिमालिका भगवतीको मन्दिरमा प्रत्येक वर्ष जनैपूर्णिमाका अवसरमा ठूलो धार्मिक मेला लाग्ने गर्छ। बाजुरासहित सुदूरपश्चिमका विभिन्न जिल्ला र देशका अन्य भागबाट समेत भक्तजन दर्शनका लागि पुग्ने गर्छन्।

धार्मिक यात्रासँगै साहसिक पदयात्रा र प्रकृतिको आनन्द लिन चाहने पर्यटकका लागि बडिमालिका महत्वपूर्ण गन्तव्य हो। कठिन भूगोल, लामो पैदल यात्रा र सीमित पूर्वाधारका बाबजुद यहाँ पुग्ने पर्यटकको आकर्षण बढ्दो छ।

श्वेता खड्काको अभिव्यक्तिले बडिमालिका केवल धार्मिक तीर्थस्थल मात्र नभई नेपालको उत्कृष्ट प्राकृतिक पर्यटकीय गन्तव्य बन्न सक्ने सम्भावनालाई पनि उजागर गरेको छ। आवश्यक सडक, पदमार्ग, सञ्चार, आवास र सुरक्षाको व्यवस्था गर्न सके बडिमालिकाले सुदूरपश्चिमको पर्यटन विकासमा महत्वपूर्ण योगदान दिन सक्छ।