जनकपुरलाई ९३ रनमै समेट्दै सुदूरपश्चिमको शानदार जित, अंक तालिकामा दोस्रो स्थानमा उक्लियो
काठमाडौ/ सुदूरपश्चिम रोयल्सले सिद्धार्थ बैंक नेपाल प्रिमियर लिग (एनपिएल) मा जनकपुर बोल्ट्सलाई पराजित गर्दै प्लेअफ यात्रा थप बलियो बनाएको छ ।
मंगलबार साँझ सम्पन्न खेलमा सुदूरपश्चिमले जनकपुरलाई २७ रनले हराएको हो । सुदूरपश्चिमले दिएको १२१ रनको लक्ष्य पछ्याएको जनकपुर १७.१ ओभरमा ९३ रनमै समेटियो ।
सामान्य लक्ष्य दिए पनि सुदूरपश्चिमका बलरले उत्कृष्ट प्रदर्शन गरेपछि जनकपुरले खेलमा फर्किने मौका पाएन । सुदूरपश्चिमले पावरप्लेभित्रै जनकपुरका तीन महत्वपूर्ण विकेट झारेको थियो ।
सुदूरपश्चिमको जितमा स्कट कुगलाइन नायक बने । उनले जनकपुरका ओपनर अनिल साह, ह्यारी टेक्टर र जेम्स निशमलाई आउट गर्दै विपक्षी टोलीको ब्याटिङमा ठूलो धक्का पुर्याए ।
हेमन्त धामी, थारिन्डु रत्नायके, दीपेन्द्रसिंह ऐरी, अनिल खरेल र इशान पाण्डेले पनि एक–एक विकेट लिए ।
जनकपुरका लागि त्रिटराज दासले सर्वाधिक २१ रन बनाए । जेम्स निशमले २०, राहुल यादवले ११ र आदित्य महताले १० रन जोड्नुबाहेक अन्य ब्याटरले उल्लेख्य योगदान दिन सकेनन् ।
यसअघि टसपछि पहिले ब्याटिङ गरेको सुदूरपश्चिमले निर्धारित २० ओभरमा नौ विकेट गुमाएर १२० रन बनाएको थियो ।
जनकपुरका बलरले सुरुदेखि नै दबाब बनाएपछि सुदूरपश्चिमको शीर्ष क्रम चल्न सकेन । ब्रान्डन म्याकमलेनले सर्वाधिक ३३ रन बनाएर टोलीको इनिङ्स सम्हाले । थारिन्डु रत्नायके २७ रनमा अविजित रहे ।
ओपनर सेफ जेइब र विनोद भण्डारीले समान १० रन बनाए । आरिफ शेखले ११ रन जोड्दा इशान पाण्डे तीन, कप्तान दीपेन्द्रसिंह ऐरी एक, स्कट कुगलाइन छ, अनिल खरेल चार, हेमन्त धामी शून्य र अभिनाश बोहरा दुई रनमा आउट भए ।
जनकपुरका हर्मित सिंहले उत्कृष्ट बलिङ गर्दै चार विकेट लिए । चार ओभरमा १७ रन खर्चिएका उनले सुदूरपश्चिमको ब्याटिङलाई नियन्त्रणमा राखेका थिए । ललित राजवंशी, राहुल यादव, आदित्य महता र अभिषेक तिवारीले एक–एक विकेट लिए ।
यस जितसँगै सुदूरपश्चिम आठ अंकसहित अंक तालिकाको दोस्रो स्थानमा उक्लिएको छ । शीर्ष स्थानको काठमाडौंसँग अंक बराबरी गरेको सुदूरपश्चिमले प्लेअफ सम्भावना बलियो बनाएको छ ।
चार अंक जोडेको जनकपुर भने पाँचौँ स्थानमा छ । लिग चरणको अन्तिम खेलमा सुदूरपश्चिमले काठमाडौंसँग र जनकपुरले चितवनसँग प्रतिस्पर्धा गर्नेछ ।
