मुख्यमन्त्री भट्टले भोलि विश्वासको मत लिने

धनगढी । सात नम्बर प्रदेशका मुख्यमन्त्री त्रिलोचन भट्टले भोलि (मंगलबार) संसदमा विश्वासको मत लिने भएका छन् ।
आइतबार बसेको प्रदेश संसदको चौथो बैठकमा सभामुख अर्जुनबहादुर थापाले मुख्यमन्त्रीले विश्वासको मत लिनका लागि फागुन २२ गते दिउँसो २ बजेको समय निर्धारण गरेको संसद सचिवालयले जनाएको छ ।
नेपालको संविधान २०७२ को धारा १६८ उपधारा ४ बमोजिम मुख्यमन्त्रीले संसदबाट विश्वासको मत लिने जनाइएको छ । उनी बाम गठबन्धनबाट मुख्यमन्त्री बनेका छन् ।
५३ सदस्यीय संसदमा विश्वासको मत प्राप्त गर्न २७ सांसदको समर्थन आवश्यक पर्छ । मुख्मन्त्री भट्टका पक्षमा एमालेका २५ र माओवादी केन्द्रका १४ गरी ३९ जना सांसदको मत रहेको रहेको छ ।
मुख्यमन्त्री नियुक्त भएको ३० दिनभित्र संसदबाट विश्वासको मत लिनु पर्ने संंवैधानिक व्यवस्था छ । सो व्यवस्थाअनुसार प्रदेश ७ मा चैत ५ गते विश्वासको मत लिनुपर्ने हुन्छ । तर राष्ट्रपति र उपराष्ट्रपतिको निर्वाचनका कारण केही दिन पहिले नै विश्वासको मत लिन थालिएको बताइएको छ ।
आइतबारको संसदमा सभामुख थापाले कार्यव्यवस्था परामर्श समितिका सदस्य चयन गरेको जानकारी गराए ।
समितिमा नेकपा (एमाले) का सांसदहरू तारा लामा तामाङ, कृष्णराज सुवेदी र अर्चना गहतराज, नेकपा माओवादी केन्द्रका अक्कलबहादुर रावल र वीरमान चौधरी, नेपाली काँग्रेसका भरतबहादुर खड्का तथा डाक्टर रणबहादुर रावल र राष्ट्रिय जनता पार्टीका सांसद मालामति राना रहेका छन् ।
त्यस्तै, बैठकमा एमाले सांसद तामाङको प्रस्ताव र काँग्रेस सांसद रैकाको समर्थनमा प्रदेशसभा नियमावली मस्यौदा समिति सर्वसम्मतीबाट गठन भएको छ ।
समितिमा एमालेका सांसदद्वय लीलाधर भट्ट र पूर्णा जोशी, नेपाली काँग्रेसका रैका र राजपाका कृष्णबहादुर चौधरी सदस्य रहेका छन् ।
५३ जनामध्ये ४५ जना सांसद उपस्थित रहेको आइतबारको बैठकमा सभामुख थापाले राष्ट्रपति चुनाव बारे निर्वाचन आयोगको सूचना पढेर सुनाएका थिए ।