२ मंसिर २०८३, मंगलबार

डिकवेलाको अविजित अर्धशतकमा लुम्बिनी फाइनलमा, सुदूरपश्चिमले फेरि खेल्नुपर्ने भयो क्वालिफायर



काठमाडौ/ निरोसन डिकवेलाको उत्कृष्ट ब्याटिङमा सुदूरपश्चिम रोयल्सलाई ६ विकेटले पराजित गर्दै साविक विजेता लुम्बिनी लायन्स नेपाल प्रिमियर लिग (एनपीएल) को तेस्रो संस्करणको फाइनलमा पुगेको छ ।

कीर्तिपुरस्थित त्रिवि क्रिकेट मैदानमा मंगलबार भएको पहिलो क्वालिफायरमा सुदूरपश्चिमले दिएको १०६ रनको सामान्य लक्ष्य लुम्बिनीले १६.४ ओभरमै चार विकेट गुमाएर पूरा गर्‍यो । लुम्बिनीको जितमा डिकवेलाले अविजित अर्धशतकीय इनिङ्स खेले ।

लगातार दोस्रो पटक फाइनल पुगेको लुम्बिनी अब उपाधि रक्षा गर्ने लक्ष्यसहित मैदान उत्रनेछ । दुई पटक उपविजेता बनेको सुदूरपश्चिम भने पहिलो क्वालिफायरमा पराजित भएपछि फाइनल प्रवेशका लागि अर्को अवसरको प्रतीक्षामा छ । उसले अब एलिमिनेटर विजेतासँग दोस्रो क्वालिफायर खेल्नेछ । बुधबार हुने एलिमिनेटरमा काठमाडौं गोर्खाज र चितवन राइनोज भिड्दैछन् ।

लुम्बिनीको जितमा डिकवेलाले ३७ बलमा सात चौका र दुई छक्कासहित अविजित ५९ रन बनाए । कप्तान रोहित पौडेलले २८ बलमा एक चौकाको मद्दतमा २१ रन जोडे ।

सुरुवातमै दुई विकेट गुमाएको लुम्बिनीलाई डिकवेला र रोहितले सम्हालेका थिए । यी दुईबीच तेस्रो विकेटका लागि ३८ रनको साझेदारी भएको थियो । ओपनर डार्सी सर्ट खाता नखोल्दै आउट भए भने आसिफ शेखले चार रन मात्रै बनाउन सके ।

डिकवेलाले सुरुमै जीवनदान पाउनु लुम्बिनीका लागि महत्वपूर्ण बन्यो । दोस्रो ओभरको दोस्रो बलमा अविनाश बोहराले उनको क्याच छाडेका थिए । त्यसको फाइदा उठाउँदै डिकवेलाले अर्धशतक पूरा गरे र टोलीलाई जितसम्म पुर्‍याए । दिलीप नाथ १० रनमा अविजित रहे । उनले विजयी छक्का प्रहार गरेका थिए ।

सुदूरपश्चिमका थरिन्दु रत्नायकेले दुई तथा स्कट कुगेलेइन र हेमन्त धामीले एक–एक विकेट लिए ।

त्यसअघि टस जितेर पहिले बलिङ रोजेको लुम्बिनीले सुदूरपश्चिमलाई निर्धारित २० ओभरमा आठ विकेटको क्षतिमा १०५ रनमै रोकेको थियो ।

सुदूरपश्चिमका कप्तान दीपेन्द्रसिंह ऐरीले एक्लै संघर्ष गर्दै सर्वाधिक ५२ रन बनाए । उनले ५१ बलमा तीन चौका र एक छक्का प्रहार गरे । इशान पाण्डेले ३३ बलमा तीन चौकासहित २७ रन जोड्नुबाहेक अन्य ब्याटरले उल्लेख्य योगदान दिन सकेनन् ।

सुरुवातदेखि नै दबाबमा परेको सुदूरपश्चिमले आठ रन जोड्दा तीन विकेट गुमाइसकेको थियो । पहिलो बलमै जर्ज मन्से आउट भएपछि टोलीको ब्याटिङ धर्मराएको थियो । तानुका दबारे र विनोद भण्डारी पनि सस्तैमा आउट भए ।

त्यसपछि दीपेन्द्र र इशानले चौथो विकेटका लागि ६४ रनको साझेदारी गर्दै टोलीलाई संकटबाट बाहिर निकाल्ने प्रयास गरेका थिए । तर १५औँ ओभरमा इशान रनआउट भएपछि सुदूरपश्चिमको इनिङ्स पुनः दबाबमा परेको थियो ।

थरिन्दु रत्नायके, आरिफ शेख र स्कट कुगेलेइन पनि लामो समय टिक्न सकेनन् । दीपेन्द्र अन्तिम ओभरको दोस्रो बलमा आउट भएपछि सुदूरपश्चिम ठूलो योगफल बनाउनबाट चुक्यो ।

लुम्बिनीका रुबेन ट्रम्पलम्यानले चार ओभरमा १२ रन खर्चेर दुई विकेट लिए । शेर मल्लले पनि दुई विकेट हात पारे । किशोर महतो र अभिषेक गौतमले एक–एक विकेट लिए । सुदूरपश्चिमका दुई ब्याटर रनआउट भएका थिए ।


प्रतिक्रिया दिनुहोस्
ताजा समाचार