७ बैशाख २०८१, शुक्रबार

खप्तड स्विजरल्याण्ड भन्दा पनि सुन्दर छ : बालकृष्ण आचार्य



धनगढी/ सुदूरपश्चिमको प्रमुख पर्यटकीयस्थल भूस्वर्ग खप्तडमा आध्यात्मिक सम्मेलनको तयारी तिव्र बनेको छ । यही जेठ २३ देखि २५ गतेसम्म हुने सम्मेलनको तयारी तिव्र पारिएको हो ।

सोही क्रममा पतञ्जलि योगपीठका महामन्त्री आचार्य बालकृष्ण धनगढी आएका छन् । आध्यात्मिक सम्मेलनका लागि उनी धनगढी पुगेका छन् ।

धनगढी पुगेका उनले आफू सुदूरपश्चिमको विकास र कल्याणको लागि आफूले सदैव सोच्ने गरेको बताए । यस्तै उनले खप्तड स्वीजरल्याण्ड भन्दा पनि सुन्दर भएको दाबी गर्दै उहाँले यसको प्रचार र विकास गरिनुपर्ने बताए ।

उनले भने, ‘खप्तड धेरै सम्भावना भएको ठाउँ हो । खप्तड स्विजरल्याण्ड भन्दा पनि सुन्दर छ । यहाँको प्रदेश सरकारले, नेपाल सरकारले खप्तडको विकास गर्नुपर्छ, हामी यसमा सहयोग गर्छौ ।’

पतञ्जलिले खप्तडलाई देश विदेशमा चिनाउन पहल गर्ने बताउँदै उनले खप्तडमा आफूले जडिबुटीको अन्वेषण पनि गर्ने बताए । उनले त्यसका लागि आफ्नो बिज्ञ टोली खप्तड पुगिसकेको जानकारी दिए । त्यस्तै निकट भविष्यमै कैलाशमानसशरोवर र खप्तडलाई आपसमा जोड्नुपर्ने उनले बताए । त्यसका लागि यहाँको सरकारलाई आफू सहयोग गर्न तयार रहेको उनले बताए ।

खप्तडमा हुने सो सम्मेलनको प्रधानमन्त्री पुष्पकमल दाहाल ‘प्रचण्ड’ ले उद्घाटन गर्नेछन् । भारतीय योगगुरु बाबा रामदेव,सङ्घीय र प्रदेश सरकारका मन्त्रीहरू, आध्यात्मिक क्षेत्रका प्रतिष्ठित व्यक्तित्वलगायत सम्मेलनमा सहभागी हुने छन् ।

सो सम्मेलन सुदूरपश्चिम प्रदेश सरकार, उद्योग, पर्यटन, वन तथा वातावरण मन्त्रालय, नेपाल पर्यटन बोर्ड, खप्तड पर्यटन विकास तथा व्यवस्थापन समिति र स्थानीय तहले आयोजना गर्न लागेका हुन् । खप्तडको धार्मिक, आध्यात्मिक र सांस्कृतिक पक्ष संरक्षण गर्न सम्मेलनको आयोजना हुन लागेको हो ।

खप्तडबाबाले ५० वर्ष साधना गरेको खप्तडलाई पर्यटकीय हिसावले ‘भर्जिन’ क्षेत्र हो । आध्यात्मिक सम्मेलनपछि खप्तडमा भारतीय र तेस्रो मुलुका पर्यटक बढ्ने विश्वास खप्तड पर्यटन विकास तथा व्यवस्थापन समितिका कार्यकारी निर्देशक तथा मूल समारोह समितिका सदस्य सचिव भीमबहादुर खड्काले बताए ।

काशीको दक्षिणामूर्ति मठमा पूर्वीय दर्शनको अध्ययन, अध्यापनपछि गहन साधनाका लागि खप्तड पुगेका खप्तडबाबाले खप्तड बसाइका क्रममा धर्म विज्ञान, विचार विज्ञान, स्वास्थ्य विज्ञान, योग विज्ञान, वेदान्त विज्ञान र आत्मज्ञानलगायत कैयौँ कृति तयार पारेका थिए ।

ठूलाठूला पाटन (चौर), पाटनभरि फैलिएका रङ्गीबिरङ्गी फूल, दह, जीवजन्तु र हिमालको प्राकृतिक सौन्दर्यले सुशोभित खप्तडबारे स्कन्द पुराणमा समेत चर्चा गरिएको पाइन्छ ।

खप्तड आध्यात्मिक, धार्मिक र प्राकृतिक वासस्थानको हिसाबले पनि त्यत्तिकै महत्वपूर्ण छ । धार्मिक किंवदन्तीका अनुसार पाण्डुपुत्र युधिष्ठिर खप्तडको बाटो हुँदै स्वर्ग गएका थिए । त्रिवेणीधाम, केदारढुङ्गा, नागढुङ्गा, खप्तड दह, खप्तड आश्रम, सहस्र लिङ्ग, खप्तडबाबाको कुटी जस्ता पवित्र धार्मिक सम्पदाले यहाँको धार्मिक गरिमालाई थप उचाइ दिएको छ ।

२२ पाटन, २५ मैदान र ५२ वटा थुम्का (झोती) ले भरिपूर्ण जैविक विविधताको फूलबारी खप्तड सयौँ प्रजाति चरा, ३७२ प्रजातिका वनस्पति र १३० थरिका जडीबुटीले भरिपूर्ण छ । समुद्री सतहबाट तीन हजार दुई सय मिटरको उचाइमा झन्डै २२५ वर्ग किलोमिटरमा फैलिएको खप्तड क्षेत्रमा सदियौँदेखि लाग्ने विविध सांस्कृतिक मेलामध्ये गङ्गा दशहरा, जनैपूर्णिमामा हजारौँ तीर्थयात्री त्यहाँ पुग्ने गरेका छन् ।

खप्तड घुम्नका लागि जेठ, असारदेखि मङ्सिरसम्मको समय उपयुक्त मानिन्छ ।

प्रतिक्रिया दिनुहोस्
विशेष समाचार