४ मंसिर २०८३, बिहिबार

महाकाली र जोगबुढा नदीको बाढी अब वेब क्यामराबाटै निगरानी




दोधाराचाँदनीमा बाढीको जोखिम न्यूनीकरण र पूर्वसूचना प्रणाली प्रभावकारी बनाउन प्रविधिको प्रयोग

धनगढी/ महाकाली र जोगबुढा नदीमा पानीको सतह तथा बाढीको अवस्थाबारे अब प्रत्यक्ष दृश्यबाटै अनुगमन गर्न सकिने भएको छ। बाढीको जोखिम न्यूनीकरण र पूर्वसूचना प्रणालीलाई थप प्रभावकारी बनाउन कञ्चनपुरको दोधाराचाँदनीमा वेब क्यामरा जडान गरी सञ्चालनमा ल्याइएको छ।

महाकाली नदीको चार लेन पुल क्षेत्र र जोगबुढा नदीको बाढीको अवस्था प्रत्यक्ष निगरानी गर्ने उद्देश्यले सो प्रणाली स्थापना गरिएको हो। जलविज्ञान तथा जलस्रोत अनुसन्धान केन्द्रअन्तर्गत जलविज्ञान कार्यालय अत्तरियाको प्राविधिक सहयोग तथा दोधाराचाँदनी नगरपालिका र यूनिसेफ नेपालको आर्थिक सहयोगमा क्यामरा जडान गरिएको हो।

यसअघि दुवै नदीमा राडार लेभल सेन्सर जडान गरी जलसतहको नियमित मापन हुँदै आएको थियो। अब वेब क्यामरा थपिएपछि नदीमा पानीको सतह बढेको, बहाव तीव्र भएको तथा बाढीको अवस्था कस्तो छ भन्ने कुरा प्रत्यक्ष रूपमा हेर्न सकिनेछ।

जलविज्ञान कार्यालय अत्तरियाका प्रमुख इन्जिनियर संजयकुमार साहले नयाँ प्रविधिले बाढीको निगरानी र विपद् व्यवस्थापनलाई थप प्रभावकारी बनाउने बताए । उनले भोटेकोशी र कालीगण्डकी नदीमा देखिने प्रकृतिका आकस्मिक बाढीको जोखिमलाई ध्यानमा राखेर महाकालीमा पनि प्रत्यक्ष निगरानी प्रणाली स्थापना गरिएको जानकारी दिए।

उनका अनुसार नदीको अवस्थाबारे समयमै जानकारी प्राप्त हुँदा तल्लो तटीय क्षेत्रका बस्तीमा पूर्वसूचना पुर्‍याउन र सम्भावित मानवीय तथा भौतिक क्षति न्यूनीकरण गर्न सहज हुनेछ।

दोधाराचाँदनी नगरपालिकाका प्रमुख किशोर लिम्बुले बाढी तथा डुबानको उच्च जोखिममा रहेका वडाका बासिन्दालाई समयमै सचेत गराउन यो प्रणाली उपयोगी हुने बताए। उनले पूर्वसूचनाका आधारमा स्थानीय बासिन्दालाई सुरक्षित स्थानमा सार्न तथा खोज र उद्धारका काम अघि बढाउन सहज हुने उल्लेख गरे।

त्यस्तै,यूनिसेफ नेपालका प्रतिनिधि नरेश निदालले बाढीबाट विशेषगरी बालबालिका र जोखिममा रहेका समुदायको सुरक्षा गर्न यस प्रविधिले महत्वपूर्ण भूमिका खेल्ने बताए । नदीको अवस्थाबारे प्रत्यक्ष जानकारी हुँदा जोखिमबारे सचेतना फैलाउन र विपद्का बेला उद्धार कार्य प्रभावकारी बनाउन सहयोग पुग्ने उनको भनाइ छ।

प्रणाली जडान गर्ने कम्पनी इनोभेटिभ इन्जिनियरिङ सर्भिसेज ९आईईएस० का अनुप खनालले गुणस्तरीय प्राविधिक प्रणाली जडान गरिएको र सञ्चालनका क्रममा देखिने समस्या समाधानका लागि आवश्यक व्यवस्था मिलाइएको जानकारी दिए।

वेब क्यामरा सञ्चालनमा आएसँगै महाकाली र जोगबुढा नदीको बाढी अनुगमनसँगै जोखिम पहिचान र पूर्वसूचना प्रवाहमा सुधार हुने अपेक्षा गरिएको छ। विशेषगरी बाढीको जोखिममा रहेका तल्लो तटीय क्षेत्रका बासिन्दाको जीउधन जोगाउन र स्थानीय विपद् प्रतिकार्य क्षमता बढाउन यो प्रणाली उपयोगी हुने विश्वास गरिएको छ।


प्रतिक्रिया दिनुहोस्
ताजा समाचार