४ मंसिर २०८३, बिहिबार

थरिन्दुको उत्कृष्ट प्रदर्शनमा सुदूरपश्चिम लगातार तेस्रो पटक फाइनलमा



काठमाडौ/ श्रीलंकन खेलाडी थरिन्दु रत्नायकेको उत्कृष्ट अलराउन्ड प्रदर्शनको मद्दतमा सुदूरपश्चिम रोयल्स नेपाल प्रिमियर लिग (एनपीएल) को फाइनलमा प्रवेश गरेको छ। बिहीबार भएको दोस्रो क्वालिफायरमा चितवन राइनोजलाई २ विकेटले हराउँदै सुदूरपश्चिमले लगातार तेस्रो पटक फाइनल यात्रा तय गरेको हो।

कीर्तिपुरस्थित त्रिवि क्रिकेट मैदानमा चितवनले दिएको १३४ रनको लक्ष्य सुदूरपश्चिमले १९.५ ओभरमा ८ विकेट गुमाएर पूरा गर्‍यो। सुदूरपश्चिमको जितमा थरिन्दु नायक बने। उनले ब्याटिङमा अविजित ५३ रन बनाउनुका साथै बलिङमा दुई विकेट लिए।

एक सय ३४ रनको लक्ष्य पछ्याएको सुदूरपश्चिम सुरुवातदेखि नै दबाबमा परेको थियो। ओपनर विनोद भण्डारीले आक्रामक सुरुवात गर्दै १३ बलमा एक चौका र दुई छक्कासहित २३ रन बनाए पनि अन्य ब्याटरले लामो समय क्रिजमा टिक्न सकेनन्।

जर्ज मन्से ८, स्कट कुगेलेइन २ र इशान पाण्डे १० रनमा आउट भएपछि सुदूरपश्चिम ४५ रनमा चार विकेट गुमाएको अवस्थामा पुगेको थियो।

त्यसपछि क्रिजमा आएका थरिन्दुले जिम्मेवारीपूर्ण ब्याटिङ गर्दै टोलीको जितको आधार तयार पारे। उनले कप्तान दीपेन्द्रसिंह ऐरीसँग पाँचौँ विकेटका लागि ३१ रन र आरिफ शेखसँग छैटौँ विकेटका लागि २६ रनको साझेदारी गरे। दीपेन्द्रले १५ र आरिफले १० रन बनाए।

एकपछि अर्को विकेट गुमिरहेको अवस्थामा पनि धैर्य नगुमाएका थरिन्दुले ४२ बलमा सात चौका प्रहार गर्दै अविजित ५३ रन बनाए। उनले नै विजयी चौका प्रहार गर्दै टोलीलाई फाइनल पुर्‍याए।

बलिङमा चितवनका रन्जित कुमारले दुई तथा कमलसिंह ऐरी, रिजन ढकाल, उसामा मिर र सलाउद्दिन खानले एक–एक विकेट लिए।

यसअघि टस जितेर पहिले ब्याटिङ गरेको चितवनले निर्धारित २० ओभरमा नौ विकेट गुमाएर १३३ रन बनाएको थियो। चितवनका लागि डाविन मलानले अविजित ७१ रन बनाए पनि अन्य ब्याटरबाट उल्लेख्य योगदान आउन सकेन।

दोस्रो ओभरमै कमिल मिशारा चार रनमा आउट भएपछि क्रिजमा आएका मलानले एक छेउ सम्हाल्दै टोलीको इनिङ्स अघि बढाएका थिए। उनले ५१ बलमा नौ चौका र दुई छक्का प्रहार गरे।

मलानले सलाउद्दिन खानसँग सातौँ विकेटका लागि ४० रनको साझेदारी गरे। खानले १६ बलमा १८ तथा कमलसिंह ऐरीले आठ बलमा १० रन बनाए। चितवनका अन्य ब्याटरले दोहोरो अंकमा रन बनाउन सकेनन्।

बलिङमा सुदूरपश्चिमका स्कट कुगेलेइनले तीन तथा थरिन्दु रत्नायकेले दुई विकेट लिए। हेमन्त धामी, कप्तान दीपेन्द्रसिंह ऐरी र इशान पाण्डेले एक–एक विकेट हात पारे।

पहिलो क्वालिफायरमा लुम्बिनी लायन्ससँग पराजित भएपछि फाइनल पुग्न दोस्रो अवसर पाएको सुदूरपश्चिमले त्यसको सदुपयोग गरेको छ। अब उपाधिका लागि सुदूरपश्चिमले आगामी शनिबार लुम्बिनी लायन्ससँग प्रतिस्पर्धा गर्नेछ। यससँगै सुदूरपश्चिमले लगातार तीन संस्करण फाइनल पुग्ने उपलब्धिसमेत हासिल गरेको छ।


प्रतिक्रिया दिनुहोस्
ताजा समाचार