एमालेमा आलोचना र आत्मालोचनाको संस्कार आवश्यक : विद्यादेवी भण्डारी
काठमाडौ/ नेकपा (एमाले) की वरिष्ठ नेता तथा पूर्वराष्ट्रपति विद्यादेवी भण्डारीले पार्टीलाई बलियो र जनतामाझ विश्वसनीय बनाउन आन्तरिक आलोचना र आत्मालोचनाको संस्कार विकास गर्नुपर्ने बताएकी छन् ।
बिहीबार पार्टीको राष्ट्रिय कार्यकर्ता भेलालाई सम्बोधन गर्दै उनले स्वस्थ आलोचना र आत्मालोचनालाई कमजोरीका रूपमा नभई पार्टी सुधारको माध्यमका रूपमा लिनुपर्नेमा जोड दिइन् ।
‘पार्टीमा कसैको स्वस्थ आलोचना समाप्त पार्नका लागि गरिएको हुँदैन र आत्मालोचना हीनताबोधको पर्याय होइन,’ उनले भनिन् ।
पार्टीभित्र नयाँ ऊर्जा, उत्साह र आत्मविश्वास जगाउन आलोचना तथा आत्मालोचनाको अभ्यासलाई निरन्तरता दिनुपर्ने उनको भनाइ थियो । आफ्ना कमजोरी पहिचान गरी सच्याउने र सही प्रवृत्तिलाई प्रोत्साहन गर्ने संस्कारले मात्रै पार्टीलाई थप सुदृढ बनाउन सक्ने उनले बताइन् ।
लामो समय संवैधानिक जिम्मेवारीमा रहेर पार्टी राजनीतिमा फर्किएपछि पहिलोपटक औपचारिक मञ्चबाट सम्बोधन गरेकी भण्डारीले आफ्नो सक्रियता कुनै पद वा व्यक्तिगत स्वार्थका लागि नभएको स्पष्ट पारिन् । पार्टीको वैचारिक स्पष्टता र संगठनात्मक सुदृढीकरण आफ्नो प्राथमिकता रहेको उनले बताइन् ।
समसामयिक राजनीतिक परिस्थितिबारे धारणा राख्दै उनले सरकारले प्रतिशोध र निषेधको राजनीति अघि बढाउनु लोकतान्त्रिक मूल्य र मान्यताविपरीत भएको टिप्पणी गरिन् ।
भण्डारीले जनताको बहुदलीय जनवाद (जबज) को मार्गदर्शनमा पार्टीलाई थप अनुशासित, एकताबद्ध र जनतासँग नजिक बनाउनुपर्नेमा जोड दिइन् । ‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न पार्टीभित्र एकता र वैचारिक स्पष्टता आवश्यक रहेको उनको भनाइ थियो ।




