४ मंसिर २०८३, बिहिबार

मस्कले भने– ट्रम्पलाई सघाउन करोडौँ खर्च गर्नु मूर्खता




काठमाडौ/ अर्बपति व्यवसायी एलन मस्कले अमेरिकी राष्ट्रपति डोनाल्ड ट्रम्प र रिपब्लिकन उम्मेदवारहरूलाई चुनावमा जिताउन ठूलो रकम खर्च गरेकोमा पछुतो व्यक्त गरेका छन् । उनले आफू ट्रम्पको ‘मेक अमेरिका ग्रेट अगेन’ (मागा) अभियानको हिस्सा नरहेको पनि स्पष्ट पारेका छन् ।

सन् २०२४ को राष्ट्रपतीय निर्वाचनमा ट्रम्पका प्रमुख आर्थिक तथा राजनीतिक सहयोगी रहेका मस्कले अहिले आफ्नो राजनीतिक समर्थनबारे फरक धारणा सार्वजनिक गरेका हुन् ।

न्युयोर्क टाइम्सका स्तम्भकार एन्ड्रु रस सोर्किनसँग डिलबुक समिटमा भएको अन्तर्वार्तामा मस्कले आफू मागा अभियानमा नरहेको बताए । चीनबाट भिडियो कलमार्फत सहभागी उनले भने, ‘म मागा होइन ।’

रिपब्लिकन पार्टीका सबै नीतिलाई आँखा चिम्लेर समर्थन नगर्ने स्पष्ट पार्दै मस्कले मागाको अर्थ पार्टीका नीतिहरूको अन्धाधुन्ध समर्थन हो भने आफू त्यसमा सहमत नरहेको बताए ।

मस्कको यो अभिव्यक्ति सन् २०२४ को चुनावी अभियानका क्रममा व्यक्त गरेको धारणाभन्दा बिल्कुलै फरक छ । त्यतिबेला न्युयोर्कको म्याडिसन स्क्वायर गार्डेनमा आयोजित ट्रम्पको चुनावी सभामा उनले आफूलाई ‘डार्क, गोथिक मागा’का रूपमा प्रस्तुत गरेका थिए ।

अन्तर्वार्ताका क्रममा मस्कले रिपब्लिकन उम्मेदवारहरूलाई चुनावमा जिताउन गरेको ठूलो आर्थिक सहयोगप्रति पनि असन्तुष्टि जनाए । सन् २०२६ को मध्यावधि निर्वाचनमा रिपब्लिकन उम्मेदवारहरूलाई सहयोग गर्न करिब ५० करोड डलर खर्च गरेकोमा अहिले आफूलाई मूर्ख लागेको उनले बताए । उनले आर्थिक सहयोग गरेका धेरै उम्मेदवार चुनावमा पराजित भएका थिए ।

‘समयलाई पछाडि फर्काउन सक्ने भए म कम पैसा खर्च गर्ने थिएँ,’ उनले भने, ‘यसले अमेरिकी चुनाव पैसाले मात्रै जितिँदैन भन्ने देखाउँछ ।’

द गार्जियनका अनुसार सन् २०२४ को राष्ट्रपतीय निर्वाचनमा ट्रम्पलाई जिताउन मस्कले कम्तीमा २५ करोड डलर चन्दा दिएका थिए । ट्रम्प निर्वाचनमा विजयी भएपछि मस्क सन् २०२५ मा उनको प्रशासनमा समेत सहभागी भएका थिए ।

सरकारी खर्च कटौती गर्ने उद्देश्यले गठन गरिएको डिपार्टमेन्ट अफ गभर्मेन्ट इफिसियन्सी (डीओजीई) को नेतृत्व सम्हालेका मस्क उक्त जिम्मेवारीमा १८० दिन रहेका थिए । पछि ट्रम्पसँग सार्वजनिक रूपमै मतभेद बढ्दै गएपछि उनी प्रशासनबाट बाहिरिएका थिए ।

ट्रम्पको चुनावी अभियानमा खुलेर आर्थिक र राजनीतिक साथ दिएका मस्कको पछिल्लो अभिव्यक्तिले उनीहरूबीचको सम्बन्धमा आएको परिवर्तनलाई थप उजागर गरेको छ । अमेरिकी राजनीतिमा प्रभाव जमाउन ठूलो रकम खर्च गरेका मस्क अहिले आफ्नै लगानीप्रति असन्तुष्ट देखिनुले चुनावमा धनबलको प्रभावबारे समेत प्रश्न उठाएको छ ।


प्रतिक्रिया दिनुहोस्
ताजा समाचार