माओवादी छाडेर रास्वपामा अधिकारी
धनगढी । धनगढी उपमहानगरपालिकाको उपमेयरमा दुई पटक प्रतिस्पर्धा गरेकी शान्ति अधिकारीले राजनीतिक दल परिवर्तन गरेकी छन्। तत्कालीन नेकपा माओवादी केन्द्र ( हालको नेकपा ) मा आबद्ध अधिकारी अब राष्ट्रिय स्वतन्त्र पार्टी (रास्वपा) मा जोडिएकी छन्।
रास्वपाका सुदूरपश्चिम प्रदेश महामन्त्री सन्तोष जोशीले अधिकारीलाई पार्टीमा स्वागत गरेका छन्। जोशीले अधिकारीलाई स्वागत गरेको तस्बिर सामाजिक सञ्जालमा सार्वजनिक गर्दै नयाँ व्यक्तित्वहरूको ज्ञान, अनुभव, क्षमता र सामाजिक योगदानलाई राष्ट्र निर्माण तथा जनताको सेवामा उपयोग गर्ने बताएका छन्।
अधिकारी २०७४ र २०७९ सालको स्थानीय तह निर्वाचनमा माओवादी केन्द्रबाट धनगढी उपमहानगरपालिकाको उपमेयर पदमा चुनाव लडेकी थिइन्। तर, दुवै निर्वाचनमा उनले सफलता पाउन सकिनन्।
२०७४ सालको निर्वाचनमा नेपाली कांग्रेसकी सुशीला मिश्र भट्ट १७ हजार ४०८ मतसहित उपमेयरमा निर्वाचित भएकी थिइन्। एमालेकी रुक्मिणी देवकोटाले १२ हजार ७६३ मत पाउँदा अधिकारीले १० हजार २५२ मत प्राप्त गरेकी थिइन्।
त्यसैगरी, २०७९ सालको निर्वाचनमा पनि अधिकारी उपमेयरको उम्मेदवार बनेकी थिइन्। उक्त निर्वाचनमा एमालेकी कन्दकला कुमारी राना १५ हजार ४७९ मतसहित विजयी हुँदा अधिकारीले १२ हजार ६७० मत प्राप्त गरेकी थिइन्।
राजनीतिसँगै सामाजिक क्षेत्रमा पनि सक्रिय अधिकारी शिक्षा उद्यमीसमेत हुन्। उनी धनगढीस्थित एरिस्टो बोर्डिङ स्कुलकी सञ्चालक हुन्। सामाजिक अभियानमा समेत संलग्न रहँदै आएकी अधिकारी पछिल्लो समय सुदूरपश्चिम प्रदेशको नीति तथा योजना आयोगको उपाध्यक्ष बन्ने चर्चामा थिइन्। तर, उनले उक्त जिम्मेवारी पाउन सकिनन्।
दुई पटक उपमेयरमा चुनाव लडिसकेकी अधिकारीको रास्वपा प्रवेशलाई धनगढीको बदलिँदो राजनीतिक समीकरणका रूपमा पनि हेरिएको छ।




