दीपेन्द्रको कप्तानी इनिङ्समा सुदूरपश्चिम प्लेअफमा, काठमाण्डुलाई सात रनले हरायो
काठमाडौ/ कप्तान दीपेन्द्र सिंह ऐरीले संकटपूर्ण अवस्थामा सम्हालिएको इनिङ्सलाई अर्धशतकमा परिणत गरेपछि सुदूरपश्चिम रोयल्स नेपाल प्रिमियर लिग (एनपीएल) को प्लेअफमा प्रवेश गरेको छ। सुदूरपश्चिमले बलिङमा पनि उत्कृष्ट प्रदर्शन गर्दै काठमान्डु गोर्खाजलाई ७ रनले पराजित गरेको हो।
कीर्तिपुरस्थित त्रिवि क्रिकेट मैदानमा शनिबार भएको लिग चरणको अन्तिम खेलमा सुदूरपश्चिमले दिएको १२६ रनको लक्ष्य पछ्याएको काठमान्डुले निर्धारित २० ओभरमा ७ विकेट गुमाएर ११८ रन मात्रै बनाउन सक्यो।
सुदूरपश्चिमले लगातार दोस्रो खेलमा कम योगफल रक्षा गर्दै जित निकालेको हो। यसअघि पनि टोलीले न्यून स्कोर बनाएको खेलमा बलरकै उत्कृष्ट प्रदर्शनका कारण जित हात पारेको थियो।
सुदूरपश्चिमले लिगका सातवटै खेल पूरा गर्दै १० अंक जोडेको छ। अंकतालिकाको शीर्ष स्थानमा रहेको उसको शीर्ष दुईमा रहने सम्भावना पनि बलियो बनेको छ। लुम्बिनी लायन्स वा काठमान्डु गोर्खाजमध्ये एक टोलीले आफ्नो अन्तिम खेल गुमाए सुदूरपश्चिम शीर्ष दुईमा रहनेछ।
पहिलो चार खेल लगातार जितेको काठमान्डुले भने पहिलो हार बेहोरेको छ। ६ खेलबाट आठ अंक जोडेको काठमान्डु तेस्रो स्थानमा छ। उसले आइतबार पोखरा एभेन्जर्ससँग खेल्नेछ। उक्त खेल जितेमा काठमान्डुलाई शीर्ष दुईमा पुग्दै पहिलो क्वालिफायर खेल्ने अवसर रहनेछ।
लक्ष्य पछ्याउने क्रममा काठमान्डुको सुरुवात निकै खराब रह्यो। ४८ रन जोड्दा पाँच विकेट गुमाएको टोलीलाई रासिद खान र दुसान हेमन्थाले केही राहत दिएका थिए। उनीहरूले छैटौँ विकेटका लागि ३४ रनको साझेदारी गरे पनि टोलीलाई जितसम्म पुर्याउन सकेनन्।
रासिद ३१ बलमा पाँच चौकासहित ३५ रन बनाएर अविजित रहे। हेमन्थाले २१ रन जोडे। अन्य ब्याटरमध्ये साम हिजलेटले ११, सन्तोष यादवले १०, आदिल आलमले आठ र कप्तान करण केसीले आठ रन बनाए। भीम शार्की र सहान अराचिगेले खाता खोल्न सकेनन्।
सुदूरपश्चिमका अनिल खरेलले दुई विकेट लिए। स्कट कुगेलेइन, हेमन्त धामी र फाबियन एलनले एक–एक विकेट लिए।
त्यसअघि टस हारेर पहिले ब्याटिङ गरेको सुदूरपश्चिमले २० ओभरमा ६ विकेट गुमाएर १२५ रन बनाएको थियो।
टोलीको सुरुवात निकै निराशाजनक रह्यो। आठ रनमै चार विकेट गुमाएर दबाबमा परेको सुदूरपश्चिमलाई कप्तान दीपेन्द्रले सम्हाले। दोस्रो ओभरमै ब्याटिङमा आएका उनले ५५ बलमा पाँच चौका र दुई छक्कासहित ६० रन बनाए।
दीपेन्द्रले आरिफ शेखसँग पाँचौँ विकेटका लागि ५४ रनको साझेदारी गर्दै टोलीलाई संकटबाट बाहिर निकाले। आरिफले २५ बलमा १६ रन बनाए। त्यसपछि थरिन्दु रत्नायकेसँग छैटौँ विकेटका लागि अर्को ५४ रनको साझेदारी गरे। थरिन्दु २३ बलमा तीन चौकासहित २६ रन बनाएर अविजित रहे।
जारी प्रतियोगितामा दीपेन्द्रको यो दोस्रो अर्धशतक हो। यसअघि उनले पोखरा एभेन्जर्सविरुद्ध अविजित ५१ रन बनाएका थिए। दुई अर्धशतक बनाउने उनी प्रतियोगिताका दोस्रो खेलाडी बनेका छन्। काठमान्डुका रासिद खानले पनि दुई अर्धशतक बनाइसकेका छन्।
काठमान्डुका जहानदाद खानले चार ओभरमा एक मेडनसहित २२ रन खर्चेर तीन विकेट लिए। सन्तोष यादवले तीन ओभरमा १६ रन दिँदै दुई विकेट हात पारे।
