६ मंसिर २०८३, शनिबार

उपाधिका लागि लुम्बिनी र सुदूरपश्चिमबीच निर्णायक भिडन्त



काठमाडौं/ नेपाल प्रिमियर लिग (एनपीएल) को तेस्रो संस्करणको च्याम्पियन बन्न आज लुम्बिनी लायन्स र सुदूरपश्चिम रोयल्सबीच प्रतिस्पर्धा हुँदैछ । कीर्तिपुरस्थित त्रिवि क्रिकेट मैदानमा हुने फाइनल खेल साँझ ५ बजे सुरु हुनेछ ।

लगातार दोस्रो संस्करण फाइनलमा पुगेका दुवै टोली यसपटक उपाधि आफ्नो पक्षमा पार्ने लक्ष्यसहित मैदान उत्रनेछन् । अघिल्लो संस्करणको फाइनलमा सुदूरपश्चिमलाई हराउँदै लुम्बिनीले उपाधि जितेको थियो । त्यसैले लुम्बिनी यसपटक पनि उपाधि जोगाउने अभियानमा छ भने सुदूरपश्चिम अघिल्लो हारको बदला लिँदै पहिलोपटक च्याम्पियन बन्न चाहन्छ ।

लिग चरणमा प्रभावशाली प्रदर्शन गरेको लुम्बिनी ११ अंक जोड्दै शीर्ष स्थानमा रहेको थियो । पहिलो क्वालिफायरमा सुदूरपश्चिमलाई ६ विकेटले हराएर लुम्बिनीले सोझै फाइनलमा स्थान सुरक्षित गरेको हो । लिग चरणको भेटमा पनि लुम्बिनीले सुदूरपश्चिममाथि सात विकेटको जित निकालेको थियो ।

पहिलो क्वालिफायरमा पराजित भएपछि पनि सुदूरपश्चिमको उपाधि सम्भावना भने समाप्त भएन । दोस्रो क्वालिफायरमा चितवन राइनोजलाई तीन विकेटले पाखा लगाउँदै सुदूरपश्चिमले फाइनल यात्रा तय गरेको हो । १० अंकसहित लिग चरणमा दोस्रो भएको सुदूरपश्चिम लगातार तेस्रोपटक फाइनल पुग्ने टोली बनेको छ ।

सुदूरपश्चिमका लागि यसपटकको फाइनल विगतका दुई हारको इतिहास बदल्ने अवसर पनि हो । पहिलो संस्करणको फाइनलमा जनकपुर बोल्ट्ससँग पराजित भएको सुदूरपश्चिम दोस्रो संस्करणमा लुम्बिनीसँगै रोकिएको थियो । लगातार तीनपटक फाइनल पुगे पनि उपाधि जित्न नसकेको अवस्थालाई अन्त्य गर्ने चुनौती सुदूरपश्चिमसामु छ ।

दुवै टोलीमा राष्ट्रिय तथा अन्तर्राष्ट्रिय क्रिकेटको अनुभव बटुलेका खेलाडीको उपस्थिति छ । लुम्बिनीको कप्तानी रोहित पौडेलले गरिरहेका छन् भने सुदूरपश्चिमको नेतृत्व दीपेन्द्रसिंह ऐरीले सम्हालिरहेका छन् । विगतका नतिजा लुम्बिनीको पक्षमा रहे पनि फाइनलमा उत्कृष्ट प्रदर्शन गर्ने टोलीले नै उपाधि उचाल्नेछ ।


प्रतिक्रिया दिनुहोस्
ताजा समाचार