४ श्रावण २०८१, शुक्रबार

तीन दिने खप्तडमा आध्यात्मिक सम्मेलन मंगलबार शुरु हुँदै, प्रधानमन्त्रीले उद्घाटन गर्ने



धनगढी/ धार्मिक तथा पर्यटकीय क्षेत्र खप्तडमा मंगलबार (आज) शुरु हुने तीन दिने आध्यात्मिक सम्मेलनको तयारी अन्तिम चरणमा पुगेको छ ।

सो सम्मेलनको प्रधानमन्त्री पुष्पकमल दाहाल प्रचण्डले उद्घाटन गर्ने भएका छन् । सो कार्यक्रममा पूर्व प्रधानमन्त्रीहरु योगगुरु बाबा रामदेव, पतञ्जलि योगपीठका महामन्त्री आचार्य बालकृष्ण लगायतको उपस्थिति हुने भएको छ ।

सुदूरपश्चिम प्रदेशका मुख्यमन्त्री कमलबहादुर शाहको अध्यक्षतामा हुने कार्यक्रममा प्रधानमन्त्री प्रचण्डले खप्तडको विकास योजना बारे विशेष सम्बोधन गर्ने अपेक्षा गरिएको छ ।

उद्घाटनमा सुदूरपश्चिमका भुँवा, हुडक्यौली, गौरा, देउडा, पुतला नाच लगायतका सांस्कृतिक झाँकी देखाउने भएको छ ।
यस्तै गरेर बाबा रामदेवले पनि योगा अभ्यास गराउने नेपालका योग प्रभारी लबदेव मिश्रले बताए । पहिलो दिन बाबा रामदेब र त्यसपछिका दुई दिन आचार्य बालकृष्ण र आफूले योगा अध्यास गराउने कार्यक्रम रहेको मिश्रले बताए ।

खप्तड पर्यटन विकास तथा व्यवस्थापन समितिका अध्यक्ष हर्कबहादुर सिंहले दोस्रो दिन योगा अध्यासका साथसाथै त्रिभुवन विश्वविद्यालयका प्राध्यापक डा. राजाराम सुवेदीले धार्मिक र पर्यटन सम्वन्धमा कार्यपत्र प्रस्तुत गर्नु हुने बताए ।

सो अवसरमा चतराधाममा बस्नुहुने नेपालकै प्रथम महायोगी जगतगुरुले शिद्धबाबा कष्णदास महाराजले पनि प्रवचन दिने कार्यक्रम छ ।

उद्घाटनका लागि प्रधानमन्त्री प्रचण्ड ,सुदूरपश्चिमका प्रदेश प्रमुख र बाबा रामदेव मंगलबार नै खप्तड पुग्ने कार्यक्रम रहेको छ, भने प्रदेशका मुख्यमन्त्री, सभामुख, मन्त्रीहरु , आचार्य बालकृष्ण खप्तड पुगिसकेको खप्तड पर्यटन विकास तथा व्यवस्थापन समितिका कार्यकारी निर्देशक तथा मूल समारोह समितिका सदस्य सचिव भीमबहादुर खड्काले बताए ।

खप्तडमा झण्डै ५०० जनाको जमघट हुने अनुमान गरिएको छ । ती सबैका लागि टेन्ट, स्लिपिङ व्याग र खानपिनको व्यवस्था गरिएको छ ।

सो सम्मेलन सुदूरपश्चिम प्रदेश सरकार, उद्योग, पर्यटन, वन तथा वातावरण मन्त्रालय, नेपाल पर्यटन बोर्ड, खप्तड पर्यटन विकास तथा व्यवस्थापन समिति र स्थानीय तहले आयोजना गर्न लागेका हुन् । खप्तडको धार्मिक, आध्यात्मिक र सांस्कृतिक पक्ष संरक्षण गर्न सम्मेलनको आयोजना हुन लागेको हो ।

खप्तडबाबाले ५० वर्ष साधना गरेको खप्तडलाई पर्यटकीय हिसावले ‘भर्जिन’ क्षेत्र हो । आध्यात्मिक सम्मेलनपछि खप्तडमा भारतीय र तेस्रो मुलुका पर्यटक बढ्ने विश्वास गरिएको छ ।

काशीको दक्षिणामूर्ति मठमा पूर्वीय दर्शनको अध्ययन, अध्यापनपछि गहन साधनाका लागि खप्तड पुगेका खप्तडबाबाले खप्तड बसाइका क्रममा धर्म विज्ञान, विचार विज्ञान, स्वास्थ्य विज्ञान, योग विज्ञान, वेदान्त विज्ञान र आत्मज्ञानलगायत कैयौँ कृति तयार पारेका थिए ।

ठूलाठूला पाटन (चौर), पाटनभरि फैलिएका रङ्गीबिरङ्गी फूल, दह, जीवजन्तु र हिमालको प्राकृतिक सौन्दर्यले सुशोभित खप्तडबारे स्कन्द पुराणमा समेत चर्चा गरिएको पाइन्छ ।

खप्तड आध्यात्मिक, धार्मिक र प्राकृतिक वासस्थानको हिसाबले पनि त्यत्तिकै महत्वपूर्ण छ । धार्मिक किंवदन्तीका अनुसार पाण्डुपुत्र युधिष्ठिर खप्तडको बाटो हुँदै स्वर्ग गएका थिए । त्रिवेणीधाम, केदारढुङ्गा, नागढुङ्गा, खप्तड दह, खप्तड आश्रम, सहस्र लिङ्ग, खप्तडबाबाको कुटी जस्ता पवित्र धार्मिक सम्पदाले यहाँको धार्मिक गरिमालाई थप उचाइ दिएको छ ।

२२ पाटन, २५ मैदान र ५२ वटा थुम्का ९झोती० ले भरिपूर्ण जैविक विविधताको फूलबारी खप्तड सयौँ प्रजाति चरा, ३७२ प्रजातिका वनस्पति र १३० थरिका जडीबुटीले भरिपूर्ण छ । समुद्री सतहबाट तीन हजार दुई सय मिटरको उचाइमा झन्डै २२५ वर्ग किलोमिटरमा फैलिएको खप्तड क्षेत्रमा सदियौँदेखि लाग्ने विविध सांस्कृतिक मेलामध्ये गङ्गा दशहरा, जनैपूर्णिमामा हजारौँ तीर्थयात्री त्यहाँ पुग्ने गरेका छन् ।

खप्तड घुम्नका लागि जेठ, असारदेखि मङ्सिरसम्मको समय उपयुक्त मानिन्छ ।

अधिकांश तस्बिर केआर जोशीको फेसबूकबाट पेजबाट लिइएको हो ।

प्रतिक्रिया दिनुहोस्
विशेष समाचार