धानको बाला नलागेपछि वीऊ बिक्रेतालाई कारबाही हुँदै

धनगढी । कैलाली र कञ्चनपुरका किसानले लगाएको गरिमा जातको धान नपसाएपछि वीऊ विक्रेतामाथि कारबाही प्रक्रिया अघि बढाइएको छ । महेन्द्रनगरमा रहेको कृषि ज्ञान केन्द्रले दुवै जिल्लाका धानको वीऊ बिक्रेताहरूको तथ्यांक संकलनको काम सुरु गरेको जनाएको छ ।

तथ्यांक संकलनपछि मुद्दा दर्तालगायतको कारबाही प्रक्रिया अघि बढाइने ज्ञान केन्द्रले जनाएको छ । वीऊबिजन गुणस्तर नियन्त्रण केन्द्रले बिक्रेताहरूको यथार्थ जानकारी संकलन गरी आवश्यक कारबाही प्रक्रिया अघि बढाउन पत्राचार गरेको छ ।
सोहीअनुसार बिक्रेता र बिक्री भएको वीऊको मात्राबारे विवरण संकलनको काम भइरहेको कृषि ज्ञान केन्द्र कञ्चनपुरका निमित्त प्रमुख रामचन्द्र भट्टले बताए ।
कृषि ज्ञान केन्द्रले संकलन गरेको तथ्यांकअनुसार हालसम्म कैलाली र कञ्चनपुरमा करिब २५ क्विन्टल गरिमा धानको वीऊ बिक्री भएको विवरण प्राप्त भएको छ । सो परिमाण अझै बढ्न सक्ने देखिन्छ ।
यसैगरी कैलाली र कञ्चनपुरमा एक हजार दुई सय १९ परिवारले तीन सय ४९ हेक्टरमा गरिमा जातको धान लगाएको तथ्यांक संकलन भएको छ । गत वर्ष केही किसानले मात्रै गरिमा धान लगाएका थिए । बढी फल्ने र खानामा मिठो हुने भएकाले कृषकहरूले यसलाई धेरै रुचाएको बताइन्छ ।

तर, यसपटक गरिमा जातको धान नपसाएपछि कृषकहरू निकै चिन्तित भएका छन । कञ्चनपुरको भीमदत्त तथा शुक्लाफाँटा, बेलौरी र पुनर्वास नगरपालिका तथा बेलडा“डी गाउ“पालिकामा यस वर्ष गरिमा धान लगाइएको बताइन्छ  ।
यसैगरी कैलालीमा जोशीपुर, कैलारी र जानकी गाउ“पालिका तथा घोडाघोडी, गौरीगंगा र टीकापुर नगरपालिकामा यो जातको धान रोपिएको थियो ।
कात्तिकसम्म पनि धान नपसाएपछि कृषकहरू निकै चिन्तित बनेका छन । सुदूरपश्चिम कृषि विकास निर्देशनालयले असोज पहिलो साता गरिमा धानको अनुगमन तथा छानबिनका लागि कार्यदल बनाएको थियो ।
निर्देशनालयका प्रमुख यज्ञराज जोशीको संयोजकत्वमा रहेको कार्यदलले तथ्यांक संकलनसँगै धानको अहिलेको अवस्थाबारे पनि अनुगमन गरिरहेको छ ।