सेहेरीस्थित शिवकुण्डमा पर्यटकको आकर्षण बढ्दै



सेहरी (कैलाली)  ।  धार्मिक महत्त्व पाएको कैलाली सेहरीको शिवकुण्ड आन्तरिक पर्यटकको रोजाईमा पर्न थालेको छ । पूर्वपश्चिम राजमार्गको स्याउलेबाट करिब दुई किलोमिटर दक्षिणमा लक्ष्मी महिला सामुदायिक वनमा पर्ने शिवकुण्डमा स्थानीयले माघी, औंसी, पूर्णिमामा स्नान गर्दै आएका छन् ।

२५ वर्षदेखि शिवकुण्डमा एकादशी तथा औंशी नुहाउँदै आएका जोनापुरका ७० वर्षीया जगनी दासी भगवानको शक्तिका कारण अनवरत रूपमा धर्तीबाट पानी आइरहेको विश्वास राख्छिन् । ‘तीर्थ हो, कैलाशधाम हो’ दासी भन्छन्, ‘शक्ति छ त्यसैले आफै पानी आउँछ ।’ जगनीजस्तै, अरू स्थानीयको पनि शिवकुण्डप्रति विश्वास छ । ‘सुन्दै आएको छु, देखिरहेको छु, स्थानीय भगत रानाले भने, भल्का दैवी शक्ति र ऐतिहासिक हो, परापूर्वकालबाट अनवरत रूपमा पताल (जमिन) बाट पानी आइरहेको छ ।’ जमिनबाट आफै पानी आउने भएकाले स्थानीयले यसलाई भल्का भन्ने गरेका छन् ।
धार्मिक महत्त्व बोकेको शिवकुण्डमा वनभोज र रमाइलोका लागि आउने पनि बढ्दै गएका छन् । आंैसी, एकादशी, पूर्णिमाका दिन तीर्थालुहरू आउँछन् भने सार्वजनिक बिदाका दिन धनगढी, अत्तरियाबाट वनभोजका लागि समूहहरू आउने गरेका स्थानीय श्रीबहादुर चौधरीले बताए । बिदा र पर्वको समयमा ५०/६० समूह वनभोजका लागि आउँने गरेको श्रीबहादुरको भनाई छ ।

धनगढी–मटियारी सडकबाट करिब १० किलोमिटर उत्तर र पूर्वपश्चिम राजमार्गको स्याउलेबाट दुई किलोमिटर दक्षिणतर्फ रहेको ‘शिवकुण्ड’ भल्कामा स–साना समूहदेखि विभिन्न संघ/संस्था, क्लव तथा विद्यालयहरू वनभोजका लागि पुग्ने गरेका छन् ।

गएको आइतबार भल्का क्षेत्रमा भेटिएका धनगढीबाट प्रकाशित पहुरा थारू दैनिकका कार्यकारी सम्पादक प्रेम चौधरीले पत्रिकाको(बाँकी २ पेजमा) वनभोज तथा भेटघाट कार्यक्रमका लागि सो क्षेत्रमा पुगेको बताए । मनमोहक, शान्त वातावरणमा रमाइलोसँगै भेटघाट तथा औपचारिक कार्यक्रम आयोजन गर्न भल्का क्षेत्र उत्तम रहेको चौधरीले बताए ।

सामुदायिक वनको दुई विगाह क्षेत्रफलभित्र रहेको ‘शिवकुण्ड’ वनभोज आउँनेहरूका लागि आकर्षणको केन्द्र रहेको स्थानीय डाेंग्ला चौधरीले बताए ।

निर्माण अधुरो, फोहोर बढ्दो 

शिवकुण्ड संरक्षणको लागि अत्तरिया नगरपालिकाले २०७१ सालमा दिएको एक लाख ५० हजारबाट कुण्ड वरिपरि सिमेन्टको खम्वामा तारवारले घेरिएको छ । तारवार गरिएपछि त्यस क्षेत्रको रेखदेख गर्दै आएका भगत दानबहादुर रानाले खुशी व्यक्त गरे । अत्तरिया नगरपालिकाकै ६० हजार रुपैयाँको सहयोगमा गत वर्ष शिवकुण्ड परिसरमा शिव मन्दिर बनाउँन थालिए पनि थप आर्थिक अभावमा अधुरै रहेको भगत दानबहादुर रानाको भनाई छ ।

वनभोज आउँनेको धेरै भए पनि आवश्यक पूर्वाधारको अभाव र फोहोर व्यवस्थापनको कमीका कारण सो क्षेत्र दुर्गन्धित भइरहेको छ । वनभोजका लागि आउँनेहरूले फाल्ने प्लाष्टिक, मादक पदार्थका बोतल, खसीबोका तथा कुखुराको रौं जथाभावी फल्ने र मलमूत्रका कारण पवित्र भूमि दुर्गन्धित तथा अशोभनीय बन्दै गरेको स्थानीय राजेश रानाले बताए ।

लक्ष्मी सामुदायिक वन उपभोक्ता समितिका सचिव हर्षराज चौधरीले वनभोज स्थल व्यवस्थापनका लागि कार्ययोजना तयार गरिरहेको र छाडा पशुचौपाया र वनभोजमा आउने व्यक्तिले गर्ने फोहोर व्यवस्थापनमा चुनौती रहेको बताए । शिवकुण्डलाई आन्तरिक पर्यटकीय स्थलको रूपमा विकास गर्न सकिने सम्भावना छ तर उचित कार्ययोजना छैन ।

प्रतिक्रिया दिनुहोस्