धनगढीमा किशोरी सामूहिक बलत्कारको आरोपमा दुई किशोर पक्राउ
धनगढी/ धनगढी उपमहानगरपालिका वडा नम्बर १० जुगेडाकी एक १३ वर्षीया किशोरीलाई सामूहिक बलात्कार गरेको आरोपमा १६ र १७ वर्षका दुई किशोर पक्राउ परेका छन् ।
सो घटना गएको फागुन १७ गते रातिको भएको थियो । तर प्रहरीमा ढिलोगरि उजुरी परेपछि उनीहरुलाई हिजो मंगलबार मात्रै पक्राउ गरिएको जिल्ला प्रहरी कार्यालय कैलालीका प्रहरी नायव उपरीक्षक (डीएसपी) कुलदिप चन्दले जानकारी दिए ।
डीएसपी चन्दका अनुसार पीडित पक्षबाट हिजो मौखिक उजुरी आउने वित्तिकै बलात्कार आरोपी दुई किशोरहरुलाई पक्राउ गरिएको हो । आरोपी पक्राउ परेपछि आज उनीहरुविरुद्ध जाहेरीसमेत दर्ता भएको डीएसपी चन्दले बताए ।
किशोरीको आजै स्वास्थ्य परीक्षणसमेत गरिएको छ । घटनाबारे अनुसन्धान प्रक्रिया अगाडि बढेको डीएसपी चन्दले बताए । आरोपी नाबालक भएकाले प्रहरीले उनीहरुको नाम सार्वजनिक नगरेको प्रहरीले बताएको छ।
