नेतृत्व परिवर्तन टार्न खोज्नु मुलुकका लागि घातक

काठमाडौं/ एमाले, माओवादी केन्द्र र एकीकृत समाजवादीका सक्रिय युवा नेताहरूले पुराना राजनीतिक नेताहरूलाई स्पष्ट सन्देश दिएका छन् – अब नेतृत्व परिवर्तन टार्न खोज्नु मुलुकका लागि घातक हुनेछ।

जेनजी आन्दोलनको सन्देशलाई आत्मसात् गर्दै नेताहरूलाई चनाखो बनाउने उद्देश्यले मंगलबार २८ युवाले सामूहिक विज्ञप्ति जारी गरेका छन्। उनीहरू भन्छन् – अबको युग पुस्तान्तरण र राजनीतिक शुद्धीकरणको हो।

यी हुन हस्ताक्षर गर्नेहरु
विज्ञप्तिमा हस्ताक्षर गर्नेहरूमा एमाले केन्द्रीय सदस्य उषाकिरण तिम्सेना र अरविन्द सिंह, माओवादी केन्द्र, एकीकृत समाजवादीका युवानेता अशेष घिमिरे, करुणा पराजुली, अखिल क्रान्तिकारीका उपाध्यक्ष विराज थापा र ममता अधिकारी लगायत छन्।

भन्छन्– ‘सुनिएन भने आन्दोलन अझै चर्किन्छ’
युवाहरूको भनाइ छ, “जेनजी आन्दोलन कुनै आकस्मिक घटना होइन, यो दशकौंदेखि सञ्चालित असफलता, भ्रष्टाचार र सत्तालोलुपताको प्रतिफल हो। नेतृत्वले अझै पनि आवाज नसुन्ने हो भने मुलुक अझै ठूला संकटतर्फ धकेलिनेछ।”

पुराना नेताहरूको बहिर्गमनको माग
उनीहरूले लामो समयदेखि नेतृत्वमा रहेका व्यक्तिहरूले पार्टी कब्जा गरेर पालैपालो सत्ताको खेल खेल्दै आएको आरोप लगाउँदै अब ती नेताहरूले बाटो छोड्नुपर्ने बताएका छन्।

राजनीतिक पुनर्गठनबिना विकल्प छैन
‘राजनीतिक दलहरूको पुनर्गठन नै आजको मुख्य आवश्यकता हो,’ विज्ञप्तिमा भनिएको छ। ‘दलहरू सुधार नगरे जनताको भरोसा गुम्छ। चुनाव र लोकतान्त्रिक प्रक्रिया सशक्त बनाउन पुराना अनुहारहरूको स्थानान्तरण अपरिहार्य छ।’

सडकको आवाजलाई सम्मान गरौं
उनीहरू भन्छन्, “जेनजी आन्दोलनले जनताको आवाज बुलन्द बनाएको छ। पार्टी र राज्यलाई आफ्नो जागीरजस्तो सम्झिने नेताहरूको बेलाबेला असफलताको जवाफ अब जनताले माग्न थालेका छन्।”

अनियमितता गर्नेहरूप्रति चेतावनी
विज्ञप्तिमा आन्दोलनमा घुसपैठ गरी तोडफोड र आगजनी गर्नेहरूलाई पनि भण्डाफोर गर्न माग गरिएको छ। “जेनजी आन्दोलन जिम्मेवार र परिवर्तनमुखी हो – यसलाई बदनाम गर्न खोज्ने तत्वहरूलाई समयमै रोक्नुपर्छ,” उनीहरू भन्छन्।

युवाको निष्कर्ष
“हामीले राजनीतिक हस्तान्तरण, पारदर्शिता र जवाफदेहिताको लागि अग्रजहरूको करिब ९ दशक लामो संघर्षलाई निरन्तरता दिइरहेका छौं। अबको चुनौती भनेको पुराना गल्ती नदोहोर्‍याउनु हो।”