ओलीको स्पष्टीकरण : “गोली चलाउने आदेश सरकारबाट भएको होइन”
संविधान दिवस
काठमाडौं/ नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले जेन–जी आन्दोलनको क्रममा प्रहरीले गोली चलाउने आदेश नपाएको दाबी गरेका छन्। उनले आन्दोलनमा प्रहरीले नभइ अन्य स्रोतबाट गोली चलेको र सो विषयमा गम्भीर छानबिन हुनुपर्ने माग राखेका छन्।
संविधान दिवसका अवसरमा शुभकामना सन्देश जारी गर्दै ओलीले आन्दोलनमा हिंसा मच्चिनु पछाडि ‘षड्यन्त्रकारीको हात’ रहेको आरोप पनि लगाए। उनले सरकारबाट प्रदर्शनकारीमाथि ताकीताकी गोली हान्न निर्देशन गएको छैन भनी प्रस्ट पारे।
गत साता भएको आन्दोलनपछि ओली नौ दिन सैनिक ब्यारेकमा बसेर हिजो मात्रै भक्तपुरको गुण्डुस्थित आफ्नै डेरामा फर्केका हुन्। अहिले उनी त्यहीँबाट राजनीतिक गतिविधि नियालिरहेका छन्।
ओलीको सन्देशमा के छ
ओलीले संविधान दिवसको सन्दर्भमा जारी सन्देशमा संविधान निर्माणका चुनौती, नाकाबन्दीको सामना, र देशको सार्वभौमसत्ताको रक्षा गर्ने प्रयासलाई स्मरण गरे। उनले भने,
नेपालको संविधान नेपाली जनताले आफैंले बनाएको हो। यो हाम्रो भविष्यको रेखा हो।
उनले जेन–जी आन्दोलन शान्तिपूर्ण हुने भनिएपनि त्यसमा षड्यन्त्रकारी घुसपैठ गरी हिंसा मच्चाएको दाबी गरे। उनका अनुसार, प्रहरीसँग नभएका स्वचालित हतियारबाट गोली चलाइएको छ, र त्यसको छानबिन आवश्यक छ।
देशमा बढ्दो अशान्ति र संविधानमाथिको खतरा
ओलीले हालको अवस्थालाई संविधान र सार्वभौमसत्तामाथिको गम्भीर हमला भनेका छन्। उनले प्रधानमन्त्रीबाट राजीनामापछि देशका मुख्य संस्थामाथि भएको आक्रमणको आलोचना गर्दै भने,
सिंहदरबार जलाइएको छ, नेपालको नक्सा जलाइएको छ, देशको पहिचान मेटाउन खोजिएको छ।
नयाँ पुस्तालाई सन्देश
ओलीले युवाहरुलाई देशप्रेमको इतिहास सम्झन आग्रह गर्दै, राष्ट्र निर्माणको जिम्मेवारी लिन आह्वान गरे। उनले भनाइमा जोड दिए,
संविधान हाम्रो स्वतन्त्रताको कवच हो। हाम्रो एकता र चेतनाले मात्र देशलाई जोगाउन सकिन्छ।
अन्त्यमा ओलीको अपील
ओलीले सबै नेपालीलाई एकताबद्ध भई संविधानको रक्षा गर्न र सार्वभौमसत्ताको रक्षा गर्न आग्रह गरे। उनले स्पष्ट रूपमा भने
संविधान जोगाऔं, सार्वभौमसत्ताको रक्षा गरौँ।
यस्तो छ ओलीको शुभकामना सन्देशको पूर्ण पाठ
दिदीबहिनी तथा दाजुभाइहरू !
आज संविधान दिवस। नेपाली जनताले ७० वर्षसम्म संघर्ष गरेर आफैंले निर्वाचित गरेको संविधानसभाले बनाएको संविधान जारी गरेको दिन। लोकतान्त्रिक गणतन्त्र, सङ्घीय समावेशी व्यवस्था र जनताका अधिकार स्थापित भएको दिन।
यो संविधान निर्माण गर्दा हामीले भोगेका चुनौती तपाईँहरूको सम्झनामा ताजै छ। नाकाबन्दी र देशको सार्वभौमसत्तामाथि उत्पन्न चुनौतीलाई समेत परास्त गर्दै संविधान जारी भएको थियो। तसर्थ नेपालको संविधान नेपाली जनताले आफैले आफ्ना निम्ति लेखेको भविष्य रेखा हो।
संविधान जारी भएपछि नेपाललाई कसैले नाकाबन्दी लगाउन नसक्नेगरी भूपरिवेष्ठित देशलाई भूजडित बनाउन उत्तर दक्षिण जोड्ने यातायात संरचनाहरु बनाइरहेका थियौं। उत्तरी छिमेकी देशसँग पनि यातायात पारवहन सम्झौता गरेका थियौं। हाम्रो सार्वभौमसत्ताको सामर्थ्य विस्तार गरेका थियौं। हाम्रा विकास संरचनाहरूका जग बसालेका थियौं। अर्थतन्त्र तंग्रदै थियो।
गत साता जेन-जीको शान्तिपूर्ण हुने भनिएको प्रदर्शनका क्रममा घुसपैठ भयो- आह्वान कर्ताले भनेझैं। त्यसमा घुसपैठ गर्ने षड्यन्त्रकारीहरूले हिंसा मच्चाए, हाम्रा युवाहरुको ज्यान गयो। सरकारले प्रदर्शनकारीलाई ताकीताकी गोली हान्ने आदेश दिएको थिएन। प्रहरीसँग नभएका स्वचालित हतियारले गोली हानेको घटनाको छानबिन हुनु पर्दछ। त्यस घटनाप्रति म फेरि दुःख व्यक्त गर्दै दिवंगत युवाहरूप्रति श्रध्दाञ्जली एवं घाइतेहरुको स्वास्थ्यलाभको कामना गर्दछु।
हामी यतिबेला हाम्रो संविधानमाथि ठूलो आक्रमण भएको अवस्थामा छौँ। प्रधानमन्त्रीबाट मेरो राजीनामापछि सिंहदरबार जलाइएको छ – नेपालको नक्सा जलाइएको छ, देशको निशानी मेटाउन खोजिएको छ। जनप्रतिनिधि संस्था, न्यायालय, व्यापारिक प्रतिष्ठान र राजनीतिक दलका कार्यालय, तिनका नेता कार्यकर्ताको घर, व्यक्तिगत सम्पत्ति छानीछानी खरानी बनाइएको छ।
यसका पछाडिको षड्यन्त्रबारे आज म धेरै कुरा भन्दिनँ, धेरै कुरा समयले आफैं बयान दिनेछ। हाम्रो देश बनिरहेको थियो कि बिग्रेको थियो, वा देश बिग्रेको काल्पनिक भाष्य खडा गरेर आक्रोश विस्तार मात्रै गरिएको थियो? यी सबै कुरा हाम्रो नयाँ पुस्ताले आफैं महसुस गर्ने छ। विदेश जाने/आउने एयरपोर्टको भीडलाई नकारात्मक भनिरहेको समाज आज देश बाहिरको अनुमति बन्द हुनुलाई के ठान्ला, यो पनि समयले महसुस गराउने छ। हाम्रो नयाँ पुस्ताले आफैं बुझ्ने छ।
तर, यो कुरा समय छँदै बुझ्नु पर्ने छ, नबुझेमा हाम्रो देशको सार्वभौमसत्ता इतिहासमा मात्र रहने छ।
हाम्रा युवाहरुले काजी भीम मल्लको मृत्युदण्डबारेको इतिहास पक्कै पढ्नु भएको छ। देशको सीमाना विस्तार गरेर फर्केका भीम मल्ललाई देश फर्किनासाथ काटिएपछि पछुताउने मात्र विकल्प बाँकी रह्यो। यथार्थ भन्दा बाहिर गएर विस्तार गरिएका असन्तोषका परिणामहरु पछुताउन मात्र काम लाग्छन्, त्यस पछुतोले नै बनिरहेको देशको झन् झन् गाढा सम्झना गराउने छ।
हामी सबै पुस्ताका नेपाली एकजुट हुनु पर्दछ – सार्वभौमसत्तामाथि गरिएको प्रहार सामना गर्न र हाम्रो संविधानको रक्षा गर्न। सार्वभौमसत्ता हाम्रो अस्तित्व हो भने संविधान हाम्रो स्वतन्त्रताको कवच हो। हाम्रो एकताले नै देशसामु उत्पन्न यो अकल्पनीय सङ्कटबाट फेरि देशलाई उठाउन र जोगाउन सक्छ।
मेरो सबैमा अपील छ –
संविधान जोगाऔं, सार्वभौमसत्ताको रक्षा गरौँ।
