रेशम विरुद्ध शारदाले दिइन अर्को निवेदन
![](https://i0.wp.com/anumodankhabar.com/wp-content/uploads/2022/04/Resham-Chaudhary-11.jpg?resize=460%2C443)
धनगढी/ रेशम चौधरीलाई बाँकी सजाय मिनाह गर्दै रिहाइको विरुद्धमा परेको रिटको सुनुवाइ अब पुस १६ गते हुने भएको छ। सर्वोच्चमा सात जना न्यायाधीश रिक्त हुँदा रिटको सुनुवाइ पुस दोस्रो सातासम्म रोकिएको हो।
सर्वोच्च प्रशासनले पुस दोस्रो साताका लागि पेसी तोकेपछि टिकापुर हत्याकाण्डमा ज्यान गुमाएका प्रहरी निरीक्षक केशब बोहोराकी पत्नी शारदा कडायतले अर्को निवेदन दर्ता गराएकी छिन्।
अग्राधिकार पाइसकेको यो रिटको सुनुवाइ शारदाको यो निवेदनसँगै पुस १६ गते पहिलो प्राथमिकतामा राखेर सर्वोच्चले गर्नुपर्ने भएको छ।
‘न्यायाधीश अभावमा हाम्रो मुद्दाको सुनुवाइ आगामी चैत/वैशाखसम्म धकेलिने सम्भावना थियो,’ शारदाले भनिन्, ‘तर, अग्राधिकार पाएकाले पुस १६ का लागि पेसी तोकिएको छ। त्यसदिन पनि पहिलो प्राथमिकतामा सुनुवाइको माग गर्दै मैले अर्को निवेदन सर्वोच्चमा दर्ता गराएको छु।’
सरकारले सजाय माफी दिएको यस रिटमा ५ महिनादेखि सुनुवाइ हुन सकेको छैन।
सरकारको सिफारिसमा राष्ट्रपति रामचन्द्र पौडेलले गणतन्त्र दिवसको अवसरमा बाँकी कैद मिनाहा गरिदिएपछि चौधरी गत जेठ १५ गते रिहा भएका थिए।
राष्ट्रपतिको त्यसनिर्णयविरुद्ध टीकापुर घटनामा मारिएका सशस्त्र प्रहरी निरीक्षक केशव बोहोराकी श्रीमती शारदा कडायतले सर्वोच्चमा रिट दायर गराएकी थिइन्।
![](https://i0.wp.com/anumodankhabar.com/wp-content/uploads/2023/11/Sharadha-Kadayat-768x391.jpg?resize=720%2C367&ssl=1)
जेठ १६ गते दर्ता गरिएको रिटमा जेठ २३ गते न्यायाधीश प्रकाशमान सिंह राउतको एकल इजलासले चौधरीको बाँकी कैद मिनाहा गर्नुको कारण माग्दै मुद्दालाई अग्राधिकार दिने आदेश भएको थियो।