कोरोना र क्वारेन्टाइनमा मरेकालाई क्षतिपूर्ति दिइनुपर्छ
![](https://i0.wp.com/www.anumodankhabar.com/wp-content/uploads/2018/09/Parliament-970x647.jpg?resize=720%2C480&ssl=1)
धनगढी । सुदूरपश्चिम प्रदेश सभाको बुधबार बसेको छैटौ अधिवेशनको १३ औ बैठकको शुन्य समयमा बोल्दै प्रदेश सभा सदस्य पूर्णा जोशीले कोरोना सङ्क्रमण र कोरोन्टाइनमा बस्दा मृत्यु भएकालाई राहत दिइनु पर्ने माग गरेकी छन् ।
उनले कोरोना सङक्रमण भएकालाई विभेद गर्ने गरिएकोले विशेष प्याकेज ल्याएर जनताका लागि सचेतनामुलक कार्यक्रम ल्याउनु पर्ने बताइन ।
प्रदेश सभा सदस्य जोशीले अनलाइन र दूर शिक्षा विधीबाट पठन पाठन सञ्चालन गर्न पनि प्रदेश सरकारसंग आग्रह गर्नुभयो ।
अर्का प्रदेश सभा सदस्य शुशिला बुढाथोकीले पनि क्वारेन्टाइन व्यवस्थित गरिनु पर्ने, कोरोना नियन्त्रणमा लागेकालाई विषेश सेवा सुविधा दिइनु पर्ने माग राखिन ।
सो अवसरमा अछामबाट निर्वाचित प्रदेश सभा सदस्य बलबहादुर सोडारीले अछामकै बयालापाटा अस्पतालमा रोजगारी गुमेकोले आत्मदाहको प्रयास गर्दा मृत्यु भएका सिद्धार्थ आउजीको परिवारलाई राहत दिइनु पर्ने माग राखे ।
उनले आत्मदाह गर्नु पर्ने वातावरण बनाउनेहरुलाई छानविन गरेर कार्वाही गर्नुपर्ने भनाइ पनि राखे ।
प्रदेश सभा सदस्य सोडारीले बयालपाटा अस्पताललाई प्रदेश सरकार आफैले स्वामित्व लिनु पर्ने धारणा पनि राखे ।
बैठकमा धान रोप्न लगाउनु पर्ने बेला आएकोले रासायनिक मलको व्यवस्था गर्न माग गरिएको थियो ।