१० कार्तिक २०७८, बुधबार

क्यालेण्डर बनाएर विकासका काम गर्छौ, सुशासन दिन्छौं : जोशी



दुर्गाप्रसाद जोशी

२०२५ डोटी जिल्ला साविकको भूमिराजमाडौं गाविसमा जन्मेका दुर्गाप्रसाद जोशी २०५६ सालदेखि नेकपा (एमाले)का संगठित सदस्य भई नेकपा (एमाले) कैलाली जिल्ला कमिटीका सचिवालय सदस्य तथा प्रचार विभाग प्रमुख हुन् । स्नात्तकोत्तरसम्मको अध्ययन गर्नु भएका जोशी लामो समयदेखि शिक्षण पेशामा क्रियाशील रहनुभयो । जोशी अहिले नेपाल वेष्टन एकेडेमीका क्याम्पस प्रमुख समेत रहेका छन् । जोशीलाई अहिले नेकपा (एमाले) कैलालीले धनगढी उपमहानगरपालिकाको मेयर पदको लागि उम्मेदवार बनाएको छ । प्रस्तुत छ उनै मेयर पदका उम्मेदवार जोशीसंग गरिएको कुराकानीको सारसंक्षेप :

 

 

– तपाईको धनगढी उपमहानगरपालिकाको मेयर पदको लागि उम्मेदवारी किन ? मतदाताका प्रतिक्रिया कस्तो पाउनुभएको छ ?
धनगढी उपमहानगरपालिकाको समग्र विकासँगै यहाँको समस्यालाई समाधानको लागि मैले प्रमुख पदमा उम्मेदवारी दिएको छु । म र मेरो पार्टीसँग धनगढीलाई सुन्दर तथा विकासको मुलप्रवाहमा ल्याउने आँट र भिजन छ । मतदाताहरूले विकास चाहन्छन् । त्यो भिजन नेकपा (एमाले)सँग मात्रै छ भन्ने कुरा बुझेका छन् । त्यसकारण यहाँका जनताहरू एमालेलाई जिताउनको लागि चुनावको मिति कुरेर बसेका छन् । एमालेको विकासवादी सोच जनताले बुझेका कारण धनगढी नगर क्षेत्रको विकास एमालेले गर्न सक्छ भन्ने आम मतदाताहरूमा छाप परेको छ ।

– धनगढीको विकासका लागि तपाईका एजेन्डाहरू के छन् ?
कतिपय भौतिक पूर्वाधार अहिले नै बनेकाले धनगढीलाई प्रदेश नं. ७ को राजधानी बनाउनको लागि पहल गर्नेछु । शहरी विकास तथा व्यवस्थापन क्षेत्रका विज्ञहरूसँग त्यसको लागि छलफल गर्नेछु । त्यस्तै नौ वटै जिल्लाका राजनीतिक दलका प्रतिनिधिसँग छलफल गर्ने काम पनि मेरो प्राथमिकता हुनेछ । धनगढी उपमहानगरपालिकालाई महानगरपालिका बनाउनको लागि पहल हुनेछ । धनगढी उपमहानगरपालिकाको १५ वर्षीय गुरुयोजना तयार गरिनेछ । यही योजना अन्तर्गत अल्पकालीन, मध्यकालीन तथा दीर्घकालीन योजना बनाइनेछ । यसका लागि आवश्यक लगानीसँगै आवश्यक स्रोतको खोजी गर्नेछु । अव्यवस्थित बसोबासलाई व्यवस्थित गर्दै सडक सञ्जाल विस्तार गर्नेछु । धनगढी उपमहानगरपालिकाका १९ वटै वडाहरूलाई छुने गरी चक्रपथ निर्माणको लागि पहल गर्ने मेरो योजना छ । यस्तै, ढल विकास, फोहर व्यवस्थापन, सडक सञ्जाल विस्तार तथा सुरक्षित धनगढी शहर निर्माणको लागि पहल गर्नेछु । यस क्षेत्रलाई लोडसेडिङ्ग मुक्त बनाउँदै विशेष आर्थिक एवं औद्योगिक क्षेत्र निर्माण मार्फत रोजगारीको सिर्जना गर्दै आर्थिक रूपमा समृद्ध धनगढीको परिकल्पना गरेको छु । जुन कुरा मेरो पार्टीको घोषणा पत्र र प्रतिवद्धता पत्रमा पनि सार्वजनिक गरको छौं ।

युवाहरूलाई लक्षित गरी योजना के छन् ?
युवाहरूलाई स्वदेशमा नै रोजगारी दिनको लागि प्राविधिक शिक्षालयको स्थापनाको लागि जोड दिनेछु । धनगढीलाई प्राविधिक शिक्षाको केन्द्रको रूपमा विकास गरिनेछ । उनीहरूलाई प्रत्येक वडामा सीपमूलक कार्यक्रमहरूलाई मैले प्राथमिकतामा राखेको छु । युवाहरूको नेतृत्व विकासको लागि पहल गरिनेछ ।

उपमहानगरपालिकामा मुख्य समस्याका रूपमा रहेको खोलानाल अतिक्रमण, कटान र डुबानको समस्यालाई कसरी समाधान गर्नुहुन्छ ?
जनताको तटबन्धको कार्यक्रमलाई प्रभावकारी रूपमा कार्यान्वयन गरिनेछ । स्थानीय तह स्वायत्त सरकार भएका कारण कटान र डुबानको समस्या पहिल्याउँदै त्रिवर्षीय योजना बनाइनेछ । यसको लागि दातृ निकायहरूबाट सहयोग लिँदै तीन वर्षभित्र यस क्षेत्रमा मोहना, खुटिया, शिवगंगा लगायतका नदीहरूका कारण बर्सेनि हुने नदी कटान तथा डुवानको समस्यालाई नियन्त्रण गरिनेछ । धनगढी उपमहानगरपालिकाको जोखिम पहिचान गरी विपद् व्यवस्थापनको योजना कार्यान्वयनमा ल्याइनेछ ।
यस्तै, जथाभावी अनाधिकृत रूपमा नदीनाला तथा अन्य सार्वजनिक जमिनहरू मिच्ने कार्यलाई कडाईका साथ बन्द गर्नेछु । कानून हातमा लिने जुनसुकै व्यक्तिलाई कानूनको दायरमा ल्याइनेछ । व्यवस्थित ढल निकास, वृक्षारोपण एवं नदी नालाहरूको नियन्त्रण मार्फत डुवानको अन्त्य गरिनेछ ।

खुटिया—दिपालय दु्रत मार्ग सपना जस्तै भएको छ यसलाई कसरी अगाडि बढाउनुहुन्छ ?
खुटिया—दिपालय मार्गलाई द्रुत मार्गको रूपमा विकास गर्दै आधुनिक मार्गको रूपमा निर्माण गर्नको लागि पहल गरिनेछ । यो सपना र आवश्यकता हो । यसको चाँडो निर्माणको लागि ती क्षेत्रमा पर्ने अन्य स्थानीय सरकार, प्रादेशिक तथा केन्द्रीय सरकारसँग पहल गर्नेछु ।

समुदायका हिसाबले यहाँ थारू समुदाय पनि छ, थारू समुदायलाई कसरी समेटनु हुन्छ ?
यस उपमहानगरपालिकाभित्र रानाथारू र डंगौराथारू समुदायको सघन बसोबास रहेको स्थानहरूमा रानाथारू र डंगौराथारू संस्कृतिको अध्ययन स्थालको रूपमा विकास गरिनेछ । साथै ती स्थानहरूमा सम्बन्धित समुदायको सांस्कृतिक संग्राहलयको निर्माण गरिनेछ । सिंहदरबार रहेको सरकार वडाहरूमा जाने भएकाले थारू समुदायको वाहुल्यता रहको स्थानहरूमा थारू समुदायकै सरकार हो भन्ने अनुभूति गराइनेछ ।

खेलकुद सम्बन्धी अवधारणा के हो ?
शारीरिक स्वास्थ्यका लागि प्रत्येक वडाहरूमा खेलकुद र व्यायामशालाहरूको निर्माण गर्नेछु । खेलकुद क्षेत्रको विकासको लागि धनगढीमा अन्तर्राष्ट्रिय स्तरको क्रिक्रेट मैदानको निर्माण गर्नेछु । फूलवारी र जुगेडा क्षेत्रमा खेलकुद विकासका लागि आवश्यक विशेष पूर्वाधारहरूको निर्माण गरिनेछ ।

पर्यटन क्षेत्रको विकासको लागि के गर्नुहुन्छ ?
मोहना नदी तथा मोहना कोरीडोरको संरक्षणमा विशेष जोड दिनेछु । मोहना नदी किनारको भागमा वृक्षारोपण गर्दै नदी नियन्त्रण तथा हरित साइकल लेनको विकास मार्फत पर्यापर्यटनमा जोड दिनेछु । धनगढी क्षेत्रमा बसोवास गर्ने सवै समुदायको भाषा, कला तथा संस्कृतिको विकासको लागि विशेष योजना बनाई लागु गरिनेछ । जाखोर ताल, तिल्के ताल बेहडा बाबा, शिवपुरी धाम, भादा होमस्टे लगायतका धार्मिक तथा पर्यटकीय स्थलहरूको संरक्षण तथा थप पूर्वाधारको विकास गर्दै पर्यटकीय स्थलको रूपमा प्रवद्र्धन गर्नेछु । गेटा विमानस्थलको स्तर उन्नती गर्दे अन्तर्राष्ट्रिय विमानस्थल निर्माण गरिनेछ । अर्को कुरा धनगढी प्रदेश नम्बर ७ कै केन्द्र भएकाले कर्णालीदेखि महाकाली, कैलालीदेखि अपिनाम्पा, शैपालसम्म र ताक्लाकोटसम्म हुने पर्यटकीय गतिविधिमा हाम्रो भूमिका रहन्छ ।

स्वास्थ्य, कृषि शिक्षा पशुपालन क्षेत्रको विकासको लागि तपाई योजना के रहेका छन् ?
सेती अञ्चल अस्पतालको स्तर उन्नती गर्नेछु । प्रदेशस्तरीय अस्पताल निर्माणको लागि मेरो विशेष जोड रहनेछ । कैलाली क्याम्पसको विकास गर्नछु । प्राविधिक शिक्षालयको व्यवस्था गर्ने योजना छ । यस्तै फूलवारी बहुमुखी क्याम्पसलाई सुदूरपश्चिम विश्वविद्यालयमा सम्बन्ध दिलाउनको लागि पहल गर्नेछु । दुई थरी शिक्षाको विभेद अन्त्य गर्नेछु ।
कृषि तथा पशुपालनको आधुनिकीकरण गर्दे व्यवसायिक पशुपालन प्रवद्र्धनमा विशेष जोड दिनेछु । शित गृह निर्माण तथा ह्याचरी उद्योग स्थापनाको लागि पहल गर्नेछु । भू—उपयोग नीति निर्माण गर्नेछु । धनगढीमा कृषि क्षेत्र तथा वस्ती विकासको पहिचानको लागि जोड दिने मेरो योजना रहेको छ । जग्गा जथाभावि प्लटिङ्ग गर्ने कार्यलाई नियन्त्रण गरी सडक यातायात, खानेपानी बत्ति, सार्वजनिक स्थल लगायतको सुविधा सम्पन्न मात्र जग्गाको प्लटिङ्ग गर्ने कानुनी व्यवस्था मिलाउनेछु । शिवगंगा, उर्मा, फूलवारी सिंचाई आयोजनालाई कार्यान्वयन गर्नेछु । यस्तै ल्यान्डफिल साइटको निर्माण गर्नेछु ।

–  यहाँका विपन्न वर्गको हितको लागि के गर्नुहुनेछ ?
दलित, मुक्त कमैया, सुकुम्वासी लगायतका सीमान्कृत समुदायको सशक्तीकरणमा जोड दिने मेरो योजना रहेको छ । जीविकोपार्जन तथा जीवनस्तर अभिवृद्धिको लागि सीप तथा रोजगारीमूलक विशेष कार्यक्रमहरू सञ्चालन गरिनेछ । यस्तै सामाजिक सुरक्षा भत्तालाई बढाउने योजना रहेको छ ।
चुनाव जित्नेमा कतिको विश्वस्त हुुनुहुन्छ ? धनगढीको हकमा तपाईको प्रतिस्पर्धा कुन दलसँग रहन्छ जस्तो लाग्छ ?
एमालेको राष्ट्रियता प्रतिको अडान र एमालेले जनताका लागि विकासप्रेमी कामहरू गरेको छ । यसलाई जनताहरूले विर्सेका छैनन् । पहिलो चरणमा एमालेप्रतिको जनलहरले देखाइसकेको छ । एमाले चुनाव हार्दैन । अहिले यस अघि अर्को पार्टीमा उम्मेदवार भएका साथीहरू, लामो समय अर्को पार्टीप्रति आस्था राखेर बसेका साथीहरू नेकपा (एमाले) लाई विश्वास गरी हाम्रो पार्टीमा प्रवेश गरिरहनु भएको छ त्यसैले हामीले चुनाव जित्छौं यसमा कुनै शंका नै छैन । एमालेलाई म जस्तो कुनै उम्मेदवारलाई जिताउन मात्र होइन हाम्रा वडाको विकास, उपमहानगरको विकास र देश निर्माणका लागि जिताउनु पर्ने हो । हामी हाम्रा लागि कसैसँग लडिरहेका छैनौं, देश बनाउनका लागि एमालेलाई भोट मागिरहेका छौं । तर पनि धनगढीमा नेकपा (एमाले)को प्रतिस्पर्धा नेपाली कांग्रेससँग हुन्छ । प्रतिस्पर्धा भए पनि हामी सहजै चुनाव जित्छौं ।

सेवाग्राहीहरूको सेवासुविधाको लागि तपाईले के गर्ने योजना बनाउनुभएको छ ?
भ्रष्टाचार मुक्त चुस्त प्रशासन बनाइने हाम्रो प्रतिवद्धता छ । जनताप्रति जवाफदेही भएर सार्वजनिक खर्च र योजनाको अनुगमन गरिनेछ । प्रत्येक वडाहरूमा नियमित अनुगमन समिति बनाइने छ । अनुगमन समितिहरूले पनि बदमासी गरेको पाइए जनताहरूले सिधै मेयर तथा उपमेयरलाई सम्पर्क गर्नको लागि हटलाईनको व्यवस्था गरिनेछ । राजनीतिलाई सहि ट्रयाकमा ल्याउनको लागि पहल गर्नेछु । क्यालेण्डर बनाएर विकासका काम गर्छौ । त्यसमा मेयर, उपमेयर, वडा अध्यक्षले सञ्चालन गर्ने कामहरूको बारेमा उल्लेख गरेर जनताहरूलाई जानकारी दिई सोही अनुसार काम गर्नेछु ।

अन्तमा मतदातालाई के भन्न चाहानुहुन्छ ?
मेरा र मेरो पार्टीका विचारहरू राख्ने अवसर दिनुभएकोमा तपाई र यो प्रतिष्ठित मिडियालाई धन्यवाद दिन चाहान्छु । हामी जुन पाँच वर्षको विकासे योजना लिएर जनअदालतमा जार्दैछु । जनअदालतले हाम्रो पक्षमा फैसला गर्ने हामीले विश्वास लिएका छौं । नेकपा (एमाले)ले मात्रै सबै जनताका समस्यालाई पहिचान गरेको छ । त्यसैले मतदाताहरूले आफ्नो मतअधिकार हाम्रो पक्षमा हाल्ने विश्वास लिएका छौं । १९ वटा वडाका अध्यक्षसहित मेयर तथा उपमेयरलाई जिताउनको लागि तपाई मतदाताको भूमिका रहेको छ । हामी निर्वाचित भएमा जनताको आशालाई पूर्णता दिनेछौं । जनताको मतलाई हामी खेर जान दिने छैनौं भन्ने आम मतदातामा प्रतिवद्धता जनाउन चाहान्छु ।

प्रतिक्रिया दिनुहोस्