सोनाहा समुदायको संरक्षण गरिने छ : प्रधानमन्त्री देउवा
काठमाडौं / प्रधानमन्त्री शेरबहादुर देउवाले कैलाली बर्दिया, र कञ्चनपुर जिल्लाका विभिन्न स्थानमा रहेका लोपोन्मुख सोनाहा समुदायको संरक्षण गर्न सरकार गम्भीर रहेको बताएका छन् ।
नेपाल सोनाहा संघर्ष समितिले शनिबार प्रधानमन्त्री देउवालाई ज्ञापनपत्र बुझाएपछि उनले सोनाहा समुदायप्रति सरकारले विशेष संरक्षण नीति बनाउने बताए ।
संघर्ष समितिले बर्दियाको राजापुर तथा गेरुवा, कैलालीको चिसापानी तथा कञ्चनपुरको ऐरी लगायतका स्थानमा बसोवास गर्दै आएको सोनाहा जातिलाई लोपोन्मुख जातिमा सूचीकृत गर्न माग गर्दै ज्ञापनपत्र बुझाएको थियो ।
प्रधानमन्त्री देउवाले कुनै पनि जातजातिको मौलिक पहिचानको संरक्षण गर्नु राज्यको कर्तव्य भएको बताए । उनले भने– सोनाहा जातिको भाषा, संस्कृति, सामाजिक परम्परा र रितिरिवाजको संरक्षण सरकारको दायित्व हो ।
सोनाहा समुदाय वनजंगल नजिक असुरक्षित बसोबाससँगै कर्णाली र महाकाली सहित नदी किनारामा सुन चाल्ने (बालुवामा सुन खोज्ने) र माछा मार्ने पेसा रहँदै आएको छ । नेपालमा सोनाहा जातिको जनसंख्या १२ सय रहेको छ ।
ज्ञापन पत्र बुझाउदै संघर्ष समितिका संयोजक बलबहादुर सोनाहाले आदिवासी जनजाति उत्थान राष्ट्रिय प्रतिष्ठान ऐन २०५८ को दफा २ अनुसार सोनाहालाई लोपोन्मुख जातिमा समावेश गर्न पहल गरिदिन प्रधानमन्त्री देउवालाई आग्रह गरेका थिए ।
सोनाहा समुदायको समस्या सहित प्रधानमन्त्रीलाई भेट गरेका लुम्बिनी प्रदेश प्रमुख अमिक शेरचनले सोनाहालाई लोपोन्मुख जातिमा सूचीकृत गर्न आग्रह गरे ।
लुम्बिनी प्रदेशको वर्दियाको राजापुर नगरपालिका र गेरुवा गाँउपालिकामा सोनाहाको बसोवास रहेको बताउँदै प्रदेश प्रमुख शेरचनले भने– यो लोपोन्मुख जाति हो । यसको संरक्षणका लागि अल्पसंख्यक समुदायमा समावेश गर्नुपर्ने उनीहरुको माग छ ।
सर्वोच्च अदालतले छ वर्षअघि नै सोनाहा समुदायलाई लोपोन्मुख समुदायमा सूचीकृत गर्न परामदेश जारी गरे पनि सरकारबाट अझैं औपचारिक निर्णय भएको छैन ।
सो अवसरमा राजापुर नगरपालिका प्रमुख शिवप्रसाद चौधरीले यस वर्षको बेमौसमी वर्षाका कारण आएको बाढीबाट प्रभावित बर्दियाका किसानलाई उचित राहत, कर्णाली नदी नियन्त्रणका लागि तटबन्ध निर्माणका लागि प्रयाप्त वजेट र सोनाहालाई लोपोन्मुख जातिमा सुचीकृत गर्न माग गरे ।
प्रधानमन्त्री देउवाले गत कार्तिकको पहिलो सातामा आएको बेमौसमी वर्षाका कारण प्रभावित बर्दियाको राजापुर, कैलाली, कञ्चनपुर, बझाङ, बैतडी र सुर्खेतको स्थलगत निरीक्षण गरेका थिए ।
सो अवसरमा प्रतिनिधि सभा सदस्य सन्तकुमार चौधरी, संविधान सभा सदस्य हरि श्रीपाईली उपस्थिति रहेको थियो ।
