मझगाउँ बिमानस्थल सञ्चालन गर्न भीमदत्तद्धारा एक करोड जम्मा
महेन्द्रनगर / कञ्चनपुरको भीमदत्त नगरपालिकाले लामो समयदेखि बन्द रहेको मझगाउँ विमानस्थत पुनः सञ्चालन तथा स्तरोन्नतीका लागि एक करोड रुपियाँ खातामा जम्मा गरेको छ ।
त्रियपक्षीय साझेदारी अनुसार नेपाल नागरिक उड्यन प्राधिकरणको खातामा एक करोड रुपयाँ जम्मा गरिएको नगरपालिकाले जनाएको छ । भीमदत्त नगरपालिकाका प्रमुख प्रशासकीय अधिकृत पुष्करप्रसाद भट्टले सम्झौता अुनसार नगपालिकाको तर्फबाट व्यहोर्नु पर्ने रकम मध्ये एक करोड रुपयाँ प्राधिकरणको खातामा जम्मा गरिएको बताए । उनका अनुसार बाँकी रकम असोजसम्ममा जम्मा गरिने छ ।
विमानस्थल सञ्चालन गर्न संघिय सरकार, प्रदेश सरकार र स्थानीय सरकारबिच लगानीमा साझेदारी गर्ने सम्झौता भएको थियो । गत फागुनमा संघिय सरकारको नागरिक उड्डयन मन्त्रालय, सुदूरपश्चिम प्रदेश सरकार, भीमदत्त नगरपालिका र दोधाराचाँदनी नगरपालिकाबिच विमानस्थल निर्माणका लागि सम्झौता पत्रमा हस्ताक्षर भएको हो ।
नौ बुदेँ सम्झौता पत्रमा विमानस्थल निर्माणका लागि संघिय सरकारले ५० प्रतिशत, प्रदेश सरकारले २५ प्रतिशत, भिमदत्त नगरपालिकाले १५ प्रतिशत र दोधराचाँदनी नगरपालिकाले १० प्रतिशत विमानस्थल सञ्चालन लागत व्यहोर्नु पर्ने उल्लेख गरिएको छ ।
चार दशकअघि निर्माण भएर पनि चरन र खेल मैदानमा सीमित कञ्चनपुरको मझगाउँ विमानस्थल ३७ करोडको लागतमा मझगाउँको धावनमार्ग कालोपत्रे गर्न नेपाल नागरिक उड्डयन प्राधिकरण, सुदूरपश्चिम प्रदेश सरकार र कञ्चनपुरका दुई स्थानीय तह भीमदत्त र दोधारा चाँदनी नगरपालिकाले हातेमालो गरेका हुन् ।
सम्झौता अनुसार विमानस्थलको धावन मार्ग १६ सय मिटर लामो हुने छ जसबाट साना आकारका विमान उडान वा अवतरण गर्न सकिने छ ।
भीमदत्त नगरपालिकाका नगर प्रमुख सुरेन्द्र विष्टले विमान स्थल पुनः सञ्चालनका लागि नगरपालिकाकोतर्फबाट कुनै कसर बाँकी नराखिने बताए । उनले यस क्षेत्रको आर्थिक विकास र समृद्धीसँग जोडिएको मझगाउँ विमानस्थल सञ्चालनका लागि नगरपालिकाले बहन गर्नुपर्ने दायित्वबाट पछि नहट्ने स्पष्ट पारे ।
साथै उनले संघिय र प्रदेश सरकारलाई सम्झौता अनुसार बिमानस्थलको निर्माण पक्रिया अगाडि बढाउन समेत आग्रह गरे । बिमानस्थल सञ्चालनका लागि नगरपालिकाले रकम जम्मा गरेपछि मझगाउँ विमानस्थल सञ्चालनमा हुनेमा स्थानीय आशावादी देखिएका छन् ।
