सुख्खा बन्दरगाहा बनाउन भारत सहयोगी हुन्छ मन्त्री भट्ट
![](https://i0.wp.com/anumodankhabar.com/wp-content/uploads/2020/10/11111.jpg?resize=652%2C768)
धनगढी / उद्योग, वाणिज्य तथा आपूर्तिमन्त्री लेखराज भट्टले कञ्चनपुरको दोधारा चाँदनी क्षेत्रमा अन्तरदेशीय विशेष आर्थिक क्षेत्रसहित सुख्खा बन्दरगाह बनाउन भारतका अधिकारीहरु तयार रहेको बताएका छन् ।
प्रेस संगठन नेपाल कैलालीले सोमबार गोदावरीमा आयोजना गरेको पत्रकार सम्मेलनमा उनले भारतको उत्तराखण्डस्थित रुद्रपुरसंग जोडेर अन्तरदेशीय विशेष आर्थिक क्षेत्रसहितको सुख्खा बन्दरगाह निर्माण गरिने उनले बताए ।
मन्त्री भट्टका अनुसार बन्दरगाहा बनाउन भारतीय पनि लालायित छन । उनले महाकाली नगरपालिका–१ स्थित मायापुरी र गौरीशङ्करमा सुख्खा बन्दरगाह बनाउनका लागि ४९६ हेक्टर क्षेत्रफल जग्गा लिने बताए ।
कञ्चनपुरमै दैजी छेला औद्योगिक क्षेत्र निर्माणको कार्यलाई पनि अगाडि बढाइने मन्त्री भट्टले बताए । उनले आउँदो माघ महिनाभित्रै परियोजना कार्यालय स्थापना गरेर काम अगाडि बढाइने बताए ।
दैजी छेला औघोगिक क्षेत्र निर्माणका लागि विस्तृत परियोजना प्रतिवेदन (डीपीआर) र वातावरणीय प्रभाव मूल्याङ्कन (ईआइए) भइसकेको छ । ९०० हेक्टर जमिनमा ठूला, मझौला र साना गरी १२४ वटा उद्योग स्थापना हुने मन्त्री भट्टले बताए ।
औद्योगिक क्षेत्र निर्माणको लागि आठ अर्ब रुपियाँ लाग्ने बताइएको छ । भने चार वर्षमा सो उद्योग तयार हुने जनाइएको छ । दैजी छेला औद्योगिक क्षेत्र स्थापना भएमा १५ हजारले प्रत्यक्ष र ५० हजार व्यक्तिले अप्रत्यक्ष रुपमा रोजगारी प्राप्त गर्ने अनुमान छ ।