धनगढीको सीप तथा रोजगार मेला समापन

धनगढीमा सञ्चालित सीप तथा रोजगार मेला सम्पन्न भएको छ । धनगढी उपमहानगरपालिकाको आयोजनामा फागुन ८ गते सुरु भएको मेला शुक्रबार सम्पन्न भएको हो ।

धनगगढी उपमहानगरपालिकाका उपप्रमुख कन्दकला रानाले एक समारोहका बीत मेलाको समापन गरेका हुन् । समापन कार्यक्रममा उपप्रमुख रानाले यो मेलाबाट तालिम लिएकाहरूको क्षमता अभिवृद्धि मात्रै नभएर आत्मविश्वास समेत बढेको बताइन् ।

“यो मेलाबाट थुपै्र सीप सिकेर जाँदै हुनुहुन्छ यो तालिम लिएर आर्थिक रुपमा मात्रै बलियो हुन्छन् नसोच्नुहोला उहाँहरू मानसिक रुपमा पनि बलियो हुनुभएको छ,” उनले भनिन्, “अब सीप सिकेर कि कतै काम गर्नुहुन्छ कि आफ्नै व्यवसाय सुरु गर्नुहुन्छ, खाली समय बसेर दिमाकलाई बेकामे त राख्नुहुन्न, दिमाकले काम नपायो भने विभिन्न कुरा खेल्छन् र नराम्रो कामतर्फ समेत युवा उन्मुख हुन्छन्, त्यस कारण यस तालिमले मानसिक रुपमा पनि युवाहरूलाई बलियो बनाएको छ, अब अन्य स्थानीय तहले पनि मेला सुरु गरुन्, हामी अर्को वर्षपनि सीप तथा रोजगार मेला आयोजना गर्छौँ ।”

मेलामा सुदूरपश्चिम भरिका एक हजार युवालाई सीपमूलक तालिम दिइएको छ । धनगढी उपमहानगरपालिकाले प्रदेशका नौवटै जिल्लाका एक हजार ४० युवालाई आठवटा विधामा तालिम दिएको छ । तालिममा सहभागिताका लागि प्रदेशभरिबाट चार हजार ८ सय ३० जनाले आवेदन दिएका थिए । त्यसमध्ये एक हजार ४० जनालाई छनोट गरेर तालिम दिइएको नेपाल तालिम तथा रोजगार व्यवसायी महासंघका प्रदेश अध्यक्ष प्रमोद पाठकले जानकारी दिए । महासंघको प्राविधिक सहयोग तथा धनगढी उपमहानगरको आयोजनामा सीप तथा रोजगार मेला आयोजना गरिएको हो ।

रोजगारीका अवसर पाउनका लागि दक्ष जनशक्ति तयार गर्ने, युवाहरूलाई दक्ष बनाई उद्यमी बन्न र स्टार्टअप व्यवसायका लागि उत्प्रेरित गर्ने उद्देश्यले मेला आयोजना गरिएको अध्यक्ष पाठकले बताए ।

अटोमोबाइल, इलेक्ट्रोनिक, पेन्टिङ, मेकानिकल, निर्माण, आथित्य–सत्कार, सौन्दर्य, लेखा व्यवस्थापन, सूचना प्रविधि, आर्ट एन्ड क्राफ्ट डिजाइनिङ, पुरोहित, प्लम्बिङ, वाइरिङ, मन्टेश्वरी लगायत विधामा सहभागी युवाहरूलाई निःशुल्क रूपमा सीप सिकाइएको छ ।