प्रदेश सरकारको नीति तथा कार्यक्रममाथि छलफल शुरु
धनगढी । सुदूरपश्चिम प्रदेश सभामा आर्थिक वर्ष २०७८/७९ को नीति तथा कार्यक्रममाथि छलफल शुरु भएको छ ।
प्रदेश प्रमुख गंगाप्रसाद यावदले बिहीबार प्रस्तुत गरेको प्रदेश सरकारको नीति तथा कार्यक्रममाथि प्रदेश सभामा शुक्रबारदेखि छलफल शुरु गरिएको हो । नोबेल कोरोना भाइरस (कोभिड–१९) नियन्त्रण, संक्रमितको उपचार, कोरोनाको कारण नागरिककको गुमेको रोजगार सिर्जना र कमजोर भएको अर्थतन्त्रलाई पुनरुत्थानलाई प्राथमिकता दिएर तयार गरिएको नीति तथा कार्यक्रम समय सापेक्ष रहेको प्रदेश सांसद्हरुले बताएका छन् ।
उनीहरुले नीति तथा कार्यक्रममा दिएको प्राथमिकता जस्तै गरी बजेट विनियोजन गर्न र प्रभावकारी कार्यान्वयनमा ध्यान दिन प्रदेश सरकारलाई सुझाएका छन् । प्रदेश सांसद्हरुलेनीति तथा कार्यक्रममा समेटिएकाप्रदेश सरकारले नै खोप व्यवस्थापन गर्ने, सेती प्रादेशिक अस्पताललाई शिक्षण अस्पताल बनाउन सम्भाव्यता अध्ययन गर्ने, सेती र महाकाली प्रादेशिक अस्पतालमा ‘विस्तारित स्वास्थ्य सेवा’ सञ्चालन गर्ने, सेती, महाकाली र टीकापुर अस्पताललाई विशिष्टीकृत सेवा दिने,औद्योगिक व्यवसायलाई प्रबद्र्धन गर्न प्रदेश सरकारले न्युन व्याजमा ५० लाख रुपैयाँसम्म कर्जा उपलब्ध गराउने, दुर्गम क्षेत्रमा ‘विकाससंग रोजगारी’ लगायतका कार्यक्रममा प्रभावकारी रुपमा बजेट विनियोजन गर्न र कार्यान्वयन गर्न आग्रह गरे ।
नेकपा माओवादी केन्द्रका सांसद् महेशदत्त जोशी, नेकपा एमालेका सांसद् रतनबहादुर थापा, कुन्ती जोशी, कुलविर चौधरी, लालबहादुर थापा, लिलाधर भट्ट, माया तामाङबोहरा, नेपाली कांग्रेसका सांसद् भरतबहादुर खड्का, गोविन्द बोहरा, दिव्यश्वेरी शाह लगायतले छलफलमा भाग लिएका थिए ।
प्रदेश सभाले नीति तथा कार्यक्रम प्रस्तुत गरेकोमा प्रदेश प्रमुख यादवलाई धन्यवाद दिने प्रस्ताव पारित गरेको छ । नेकपा माओवादीका प्रमुख सचेतक अक्कल रावलको प्रस्ताव र नेकपा एमालेका प्रमुख सचेतक दुर्गा विकको समर्थनमा सो प्रस्ताव पारित भएको थियो ।
नीति तथा कार्यक्रममाथि छलफल गर्न प्रदेश सभाको अर्को बैठक शनिबार दिउँसो ३ बजेका आव्हान गरिएको छ ।
