चीनबाट आज नौ लाख डोज खोप आउँदै
काठमाडौँ । राष्ट्रपति सी जिनपिङले अनुदानको घोषणा गरेको एक सातामै चीनबाट मंगलबार नौ लाख डोज खोप काठमाडौं आउँदै छ । बेइजिङबाट आठ लाख डोज खोप नेपाल एयरलाइन्सको जहाजले र कुन्मिङबाट एक लाख डोज हिमालय एयरलाइन्सले ल्याउँदै छ ।
राष्ट्रपति सीले १२ जेठमा नेपाललाई १० लाख डोज खोप अनुदानमा दिने घोषणा गरेका थिए । त्यसको भोलिपल्ट चीन सरकारले भण्डारमा खोप तयार भएको भन्दै तत्कालै लैजान नेपाललाई आग्रह गरेको थियो ।
बेइजिङस्थित नेपाली दूतावासका उपनियोग प्रमुख सुशीलकुमार लम्सालका अनुसार मंगलबार बिहान बेइजिङ पुग्ने नेपाल एयरलाइन्सको जहाज दिउँसो २ बजे खोप बोकेर काठमाडौंमा अवतरण हुनेछ । चाइना इन्टरनेसनल डेभलपमेन्ट कोअपरेसन एजेन्सीले बेइजिङस्थित खोप भण्डारबाट नेपाललाई खोप उपलब्ध गराएको हो ।
चिनियाँ साइनोफार्मले उत्पादन गरेको भेरोसेल खोप आउन लागेको हो । यसअघि पनि चीनले आठ लाख डोज भेरोसेल खोप अनुदानमै उपलब्ध गराएको थियो ।
